Bo por a conoce ta laba auto, trahando den matanan, bendiendo cosecha fresco, of aki aya trahando riba cas cu su amigonan. No solamente un Capitan retira. Pero uno cu su leyendanan a yega tur skina di mundo. Cariñosamente conoci como ‘Chip’, disciplina den botonan di bela di tur tipo y tamaño. Un nomado di curason puro y alegre. Pero no falt’e respet si.
Semper cla pa duna un man, basta cu e trabou no bira dimas grandi. E gusta traha su cadenanan, canta na anochinan di karaoke, entre su preferinan, Jimmy Buffet, Guitarman y e clasiconan di Santana. Cla pa un wega di backgammon, of tira un liña na awa, mane cu e trabounan ta kita fey man. Di mucha ela bende coco pa gana su pan. Subi t’e na top sin harnass, kita nan cu su pia, gara na un hala, tene, slide bin abou, tira un koprol, gara man pa su machete cu cuminsa habri coco. Sigur pa awo bo lo ta kere cu mi ta gañando, pero mi ta primintibo cu sigur cu si, tur loke bo a caba di lesa ta berdad. Un homber sin miedo, cu curason di oro, fanatico di tur loke ta puro. Afortunado ta esnan cu a haña e oportunidad den bida pa por a conoce ‘Chip’, un amigo, un apoyo, un cariño, un hermandad.
Cla pa saca un sonrisa cu tur persona cu e topa na caminda. Si e no hari cubo t’abo ta e problema, of bo sa kico bo a haci. Turistanan stim’e, nan ta admir’e y ta desea di por a biba liber manera e. Aruba mester mas rubiano mane ‘Chip’, cu ta piki un sushi paso e kier wak su isla mas bunita, no tin miedo di crea detaye cu ta crea placer den e horizonte y atmosfera. Un Arubiano di berdad, cu naturalesa na pecho y curason. Capitan di su propio barco, sin miedo di su destinacion.
Diasabra awo, 10 di januari 2026, di 9AM-11AM, na Olive Tree Piedra Plat. Lo tuma lugar e ultimo ceremonia di despedida. Cu su cabey preto sin tiña, na 62 aña edad. Aruba ta yama ayo y un gran danki, na su Ultimo Pirata. Condolencia na tur su sernan keri y amistadnan.
