Cu meta di mehora e proceso pa studiante Arubiano na Hulanda, e Commissie Koninkrijksaangelegenheden en Buitenlandse Betrekkingen (CKABB) di Aruba a tene recientemente un reunion constructivo cu un grupo di studianten y ex-studianten na Hulanda. Durante e sesion, sr. Manuel Lopez a duna su perspectiva tocante e potencial di e sector tecnologico pa Aruba.
Manuel Lopez, kende a studia Software Engineering na De Haagse Hogeschool, a comparti su experiencia durante e reunion. E ta trahando actualmente na Gouda, na un compania di mercadeo cu ta desaroya software pa merketeers y recruitment agencies. Ademas, e mes tin su propio negoshi na Hulanda den e mesun area di tecnologia.
Segun sr. Lopez, e reunion tabata hopi productivo y constructivo, tanto di banda di gobierno como di banda di e studiantenan y ex-studiantenan. “Tabata bon pa mira cu tin mas acceptacion y comprension di ambos banda,” el a bisa.
El a enfatisa cu software engineering ta un sector cu hopi demanda mundialmente, y e ta un profesion cu ta paga bon. Sinembargo, el a agrega: “Na Aruba e oportunidadnan den ICT ta limita. Kisas pa motibo cu no tin suficiente hende den e area ey, of pa falta di recurso. Mi ta spera cu gobierno ta mirando manera pa atrae mas companianan tecnologico, pa asina Aruba por competi internacionalmente y diversifica su economia.”
Finalisando sr. Lopez a agrega cu durante e tempo di COVID-19, companianan di tecnologia tabata hustamente ‘booming’ y esey ta mustra cu e sector aki tin hopi potencial. “Mi ta sigur cu e ta un tremendo oportunidad di crecemento pa Aruba den e area aki,” el a conclui.
