Recientemente Commissie Koninkrijksaangelegeheden en Buitenlandse Betrekkingen (CKABB) di Aruba a reuni un grupo di studiantenan y ex studiantenan na Hulanda. Meta di e reunionan tabata pa trata diferente tema di preocupacion pa studiantenan cu ta bay studia na Hulanda y intercambia idea pa yega na mihor solucion pa nos studiantenan.
Saul Ragunath kende a obtene su Master‘s degree den Ondernemingsrecht y tambe den International Business Law: Digital Innovation in Commerce and Finance na Universidad na Tilburg, tabata un di e studiantenan cu a atende e reunion.
Algun reto cu a dialoga riba dje
Un di e temanan importante cu a trata ta e idioma Hulandes, cu ketobay ta un problema pa hopi studiante cu ta bay studia na Hulanda. Un otro tema ta e posibilidad pa lanta un negoshi na Aruba y e retonan legal pa haci esaki “e asina yama red-tape mester kita”. Riba ambos tema e Parlamentarionan a indica cu ta trahando riba soluciona esaki, sr. Ragunath a indica.
Oportunidad den FinTech (Financial Technology)
Riba e tema di FinTech y companianan financiero online, sr. Ragunath ta di opinion cu ta importante pa tin leynan y suficiente conscientisacion riba e materia aki. “Awendia un cuenta di banco (betaalrekening), a bira parti di derecho humano, pasobra sin un cuenta di banco un persona no por haci diferente transaccion importante. Manera, paga huur di cas of haci pago di scol. Ademas, tin investigacionnan cu a wordo haci cu ta mustra cu e desaroyo aki tambe ta importante pa empresarionan.” Esaki ta un tema cu sr. Ragunath a bisa cu ta desea di mira mas desaroyo riba dje pronto.
Pa finalisa, sr. Ragunath a expresa cu e reunion a bay bon, a trata diferente reto y posibel solucion cual ta spera cu por cuminsa traha riba nan a termino corto. Ademas el a indica cu e ta cla pa aporta den cualkier area di ley segun locual cu el a studia pe, sea ta e area di empresa, di derecho financiero of governance.
