Mas i mas empleado den sektor di akohida di mucha ta risibí diploma
Kralrndijk–E luna aki 25 kolaboradó pedagógiko den sektor di akohida di mucha a slag pa nan estudio di MBO pa kolaborador pedagógiko asistente. Ku esaki nan ta un stap mas serka di e eksigensianan di diploma, ku ta stipulá den e ordenansa insular pa akohida di mucha for di aña pasá, den kuadro di e programa BES(t) 4 kids. Mas ku mitar di e profeshonalnan den sektor di akohida di mucha ta kumpli ku e nivel di estudio deseá i kasi mitar ta studiando.
E programa BES(t) 4 kids ke ofresé akohida di mucha di bon kalidat, seif i pagabel pa mucha di Hulanda Karibense, pa tur mucha haña chèns pa desaroyá nan mes kompletu. P’esei e ordenansa insular pa akohida di mucha a drenta na vigor na 2020. Den e ordenansa aki tin tur eksigensia di diploma stipulá na kua tur organisashon di akohida di mucha mester tene nan mes. E eksigensianan ta toka entre otro nivel di estudio di e profeshonalnan. Akohida di mucha di bon kalidat ta rekerí sufisiente trahadó kualifiká.
E añanan binidero profeshonalnan i gastoudernan na Boneiru mester tin un diploma pedagógiko di por lo ménos nivel MBO-3. Tambe un sentro di mucha mester tin por lo ménos un profeshonal riba nivel MBO-4, dirigí pa señalá retraso den desaroyo i enseñansa. Pa yuda realisá esei, e programa BES(t) 4 kids a traha huntu ku MBO Bonaire, kende ta ofresé e kursonan di BBL na nivel 2, 3 i 4, kaminda ta kombiná traha i studia.
Pa motibu ku un kurso na nivel di BBL ta tuma lugá pafó di e orarionan usual di trabou, e ta un reto pa stimulá e trahadónan. P’esei huntu ku BES(t) 4 kids a buska oportunidat pa eliminá kualke ‘bottleneck’ durante e trayekto di estudio. Asina sentronan di akohida di mucha por bin na remarke pa kompensashon pa e gastunan di personal via e sistema di ‘loonverlet’, pa e trahadónan ku ta sigui un kurso na nivel di BBL. Asina por regla remplaso pa e oranan ku e trahadónan ta atendé lès den dia.
MBO Bonaire i BES(t) 4 kids ta hopi kontentu ku un porsentahe di slag haltu i ta felisitá tur partisipante. Tamara Nicolaas, lider di proyekto BES(t) 4 kids Bonaire: “Ta tremendo ku e promé resultadonan di e programa BES(t) 4 kids ta birando visibel. Klaro ku nos di e programa ta bai purba di sostené sentronan di akohida di mucha pa keda mehorá e kalidat di akohida. Pero al final, ta e hendenan den sektor di akohida di mucha ta esnan responsabel pa mehorashon.”
1 comment