Nos a pidi Hulanda pa yuda. Nos tin ku bisa kon nos ke pa Hulanda yuda
Na sèptèmber 2004 pueblo boneriano a bai un referèndem i a skohe pa un laso direkto ku Hulanda basá riba e prinsipio di supsidiaridat. Esaki ta nifiká ku lo a repartí tareanan entre loke Hulanda ta yuda Boneiru hasi i loke Boneiru mes ta hasi. Na 2006 a konfirmá esaki i na 2010 a hasi Boneiru un parti integral di Hulanda komo Entidat Públiko (no munisipio) i a pone ku ora di traha leinan por desviá for di e parti oropeo basá riba sirkunstansianan spesífiko di nos situashon (diferensiashon positivo). I komo ku ta trata di nos situashon a palabrá ku trahamentu di lei- i reglanan i tumamentu di desishonnan ku tin impakto riba nos bida aki na Boneiru mester ser hasí den konsulta ku nos gobernashon.
I aki e sapatu ta primi serka frakshon di M21. Nos gobernashon ta konsistí di tres órgano, nan ta: Gezaghèber, Kolegio Ehekutivo i Konseho Insular. Ta nan tres huntu ta forma e gobernashon di e isla aki. Opviamente den WOLBES a deliñá kada un di e órganonan aki su outoridat i su tarea. Pero den tur esaki Konseho Insular ta e órgano mas haltu, ya ku ta Konseho Insular ta nombra i retirá miembronan di Kolegio Ehekutivo, ta Konseho Insular ta stipulá kuadro di maneho i ta stipulá e presupuesto ku fondonan pa ehekutá e maneho, i ta Konseho Insular ta traha ordenansa di lei. Den un frase: ta Konseho Insular ta e guardia di interes general di pueblo boneriano, ya ku e pueblo boneriano a skohe nan i komo tal nan ta representá e pueblo tambe.
Ta hopi ta e kasonan i nan ta birando dia pa dia mas, ku Konseho Insular ta keda kompletamente ekskluí for di desishonnan ku netamente ta mishi i tin impakto riba e bida diario di esnan ku Konseho Insular ta representá, esta pueblo. Ta den medionan di komunikashon miembronan di Konseho Insular mester tende, lesa i mira ku tal i tal minister i/òf sekretario di estado ta na Boneiru pa bin informá di un ke otro desishon ku a òf lo bai tuma na Den Haag. Otro ora ta tende, lesa i mira ku empleadonan públiko di un òf otro ministerio di Hulanda a firma dokumentonan i/òf a yega na akuerdo ku Kolegio Ehekutivo riba temanan ku tin impakto riba nos isla. Awor Frakshon M21 ta komprondé ku e interkambio di informashon ta tuma lugá primeramente riba nivel di gobernashon, esta ministerionan i Kolegio Ehekutivo, pero esei no ta kita afó ku tantu Parlamentu Hulandes, esta Tweede Kamer, pero tambe Konseho Insular mester keda informá di e desaroyonan aki. Es mas, gobièrnu Hulandes, pero tambe Kolegio Ehekutivo tin un asina yamá “informatieplicht”, esta obligashon di informashon na representantenan di pueblo. Ta den e forma akí e representante di pueblo por hasi su trabou di supervishon i kontròl riba maneho i ehekushon di maneho di gobernashon.
E siman akí nos ta habri atrobe ku bishita di minister Rob Jetten ku ta bin partisipá na un konferensia tokante klima na Aruba, na kua Boneiru tambe ta partisipá. Den e mesun rosea nos por lesa di un konsepto di lei pa ku aktividatnan den barionan ku a drenta e tanda di konsulta via internèt. Nos a kaba di protestá kontra kambionan unilateral di WOLBES i FINBES di parti di Hulanda sin ku ta envolví Konseho Insular. I asina nos por sigui menshoná mas.
Ta pa e rasonnan aki i siguiendo e NÒ ku pueblo a ekspresá na desèmber 2015, Frakshon M21 ta insistí ku mester bin ku un ofisina di Asuntunan Konstitushonal i di Reino, i tambe mester bin den e repartishon di portofolio di Kolegio Ehekutivo aktual ku un portofolio di Asuntunan Konstitushonal i di Reino, asigná na un diputado. Mester boga pa akí na Boneiru riba nivel nashonal nos ban analisá nos ku nos despues di 12 aña di laso direkto, e kontenido i funshonamentu di e relashon akí i su benefisionan òf nò pa pueblo di Boneiru. Komishon Spies a evaluá na 2015 i despues di esei “dato piskadera”. E sistema a bira kada ken pa su kuenta i Dios pa nos tur. Ta pa tal rason tambe Frakshon M21 ta konstatá ku e malkontentu den pueblo ta kresiendo bou di tur gremio, pasobra kada biaha di nobo nos ta haña nos ku sorpresa. Asuntunan ku a dura añanan pa prepará pa e komunidat, Hulanda ke pusha nan den nos garganta den un tempu masha kòrtiku i kosnan ku realmente ta nesesidat di pueblo ta keda bira rondó di nan sin tuma desishon. Tuma por ehèmpel stipulashon di un mínimo sosial ku ya tin 13 aña ku apesar di e realidat ku tur rapòrt a indiká i ku tur mandatario mes a eksperensiá, ainda no ta stipulá, ku e konsekuensia ku ketu bai 40% di nos poblashon ta biba den pobresa. P’esei M21 ta sostené e manifestashon di dia 12 awor i ta hasi un yamada riba tur hende, tambe esnan ku no ta kai den e 40%, pa demonstrá solidaridat ku nos kompatriotanan ku ta lucha pa un eksistensia desente i humano komo parti di Hulanda, e pais number tres mas riku na mundu.