Durante su mision oficial na Den Haag, parlamentario Eduard Pieters a probecha e oportunidad
pa manda un mensahe cla, firme y sin ambiguedad: Aruba ta kere firme den cooperacion
dentro di Reino Hulandes, pero no lo acepta un situacion unda, paso pa paso, ta limita su
autonomia bou di nomber di “supervision”, mientras e esencia di nos democracia ta esun
afecta.
HOFA no ta un ley tecnico pero ta un cambio di poder
Den su encuentro cu representante clave di e institucionnan di Reino Hulandes, Pieters a
presenta e posicion di fraccion di PPA tocante e Rijkswet HOFA. Un ley cu, segun e, no
solamente tin e implicacionnan tecnico-financiero, pero cu por resulta den un cambio structural
den e balansa di poder entre Aruba y Hulanda, cu lo tin e consecuencianan di largo plazo pa
autonomia y autodeterminacion di nos pais. Pieters a enfatisa cu e discusion aki no por reduci
na un cuestion tecnico of administrativo, paso esaki ta toca e derecho fundamental di Aruba pa
maneha su propio finansa y tuma decision pa su propio pueblo, sin interferencia
desproporcional di afor.
Nos no mester di Rijkswet: nos tin nos propio solucion
E posicion di PPA ta definitivo: Aruba no ta contra supervision, pero si contra imposicion sin
consenso real y sin respet pa e proceso democratico cu e mesun ministernan actual a para y
lucha p’e. Como alternativa concreto, Pieters ta bolbe propone un begrotingskamer ancra den e
propio Staatsregeling di Aruba, un mecanismo serio y structural, cu ta duna garantia di control
financiero, pero den un cuadro, unda responsabilidad ta keda den man di Aruba mes, en bes di
transferi pa nivel di Reino, sin suficiente legitimacion local.
Si Aruba ta cumpli, pakico castiga nos cu mas control?
E argumento aki ta reforza door e realidad financiero actual di Aruba, unda, a pesar di e
presionnan economico global, nos pais a logra baha su schuldquote (debe mara na e producto
domestico bruto) significativamente y ta sigui traha cu disciplina riba su finansa publico. “Nos ta
mustra cu nos por maneha nos finansa cu responsabilidad,” Pieters a subraya, “pero toch nos ta
enfrenta un propuesta cu por limita nos libertad di accion. Esey mester pone nos na reflexiona
hopi serio.”
E pregunta central ta inevitabel: si Aruba ta cumpli y ta mustra progreso, pakico tin necesidad
pa mas control externo?
Sin Aruba su bos, otro lo dicidi pa nos
Durante e combersacion, a keda evidente cu e proceso di e ley ainda no ta finalisa, mirando cu
Conseho di Estado ainda mester duna su conseho y finalmente Tweede Kamer lo tuma e
decision definitivo. Pero precisamente p’esey mes, Pieters a enfatisa importancia di presencia
activo di Aruba na Den Haag, paso sin participacion fuerte y consistente, e narativa lo ta defini
pa otro.
Awor ta e momento pa para firme of perde loke nos a gana
Pa fraccion di PPA, esaki no ta un dossier mas, pero un punto crucial, cu lo determina con
autonomia di Aruba lo ta protehi den futuro. “Nos no a lucha pa Status Aparte pa despues
entrega esaki pocopoco, paso pa paso,” Pieters a conclui cu firmeza. “Autonomia no ta
negociabel y nos tin un responsabilidad pa defende esaki cu conviccion.”