Desde su entrada den e aparato gubernamental, Minister Gerlien Croes a presenta su mes como e cara di un “politica nobo”. Sinembargo, ora analisa e realidad tras di e fachada di propaganda, e imagen cu ta keda atras ta uno di populismo, falta di transparencia y decisionnan cu ta wordo cuestiona severamente como un peliger pa e futuro politico di Pais Aruba.
Transparencia den cuestion: E viahe den jet priva
Un di e puntonan mas scur den e corto trayectorio di e mandatario ta e falta di respet pa Parlamento di Aruba y, consecuentemente, pa e pueblo cu nan ta representa. E cuestionamento riba e viahe den jet priva ta keda un herida habri. No solamente e mandatario a faya den duna cuenta debido, El’a bisa cu el’a page di su saco,pero te di awe minister Gerlien Croes no a entrega un recibo, ni un copia di transferencia di banco. Pues un declaracion manipulativo. Esaki ta pone e integridad di e Minister bao di un luz hopi negativo, categorisando su actuacion como un “berguensa” pa e nivel di gobernacion cu Aruba merece.
Enseñansa: Aumento di salario vs. Problemanan structural
Si mira e area di enseñansa, e Minister ta bende e idea di solucionnan facil. Maske a duna un aumento di salario na e docentenan, esaki ta wordo bisto como un medida populista cu no ta mishi cu e raiz di e problema: e “platoo di 35 aña”. E frustracion den e mundo educativo ta keda halto, ya cu e realidad ta mustra cu e mandatario ta pretende di soluciona problemanan, mientras cu den practica, e ta creando mas confusion y conflicto den e sector.
Titulonan “Fake” y creacion di departamentonan pa campañado
Otro punto cu ta hala atencion ta e titulo di Minister di Relacionnan di Reino. Segun critica legislativo, e posicion aki no ta existi oficialmente den e Ley di Institucion di Minister (LIM) bou di un otro minister cu no ta prome minister di Aruba,ni den otro leynan di Aruba. Ta wordo cuestiona si esaki ta simplemente un posicion “fake” bou di minister di Deporte pa crea un imagen internacional cu no tin base legal solido.
Mas preocupante ainda ta e maneho di recursonan humano. E creacion di e departamento “Ban Studia / Education USA” ta wordo bisto como un duplicacion innecesario di tareanan cu ya tabata existi den Departamento di Enseñansa. E pregunta cu ta resona den comunidad ta: Ta trata aki di un departamento nobo pa duna trabao na campañadornan politico como fabor pa voto? E mesun patronchi aki a wordo nota cu e departamento di Hoben y Mucha, unda a cera y habri structuranan bek cu e mesun contenido, simplemente pa duna un impresion di innovacion cu no t’ey.
Un desaster den cara di Hulanda
E politica di e mandatario no a pasa desapercibi na Hulanda tampoco. Informacionnan ta indica cu na Den Haag tambe tin preocupacion creciente riba e direccion cu e politica aki ta hibando Aruba. Loke a wordo presenta como un “futuro briante” ta mustra mas riba un “futuro desaster” den apenas un aña di gobernacion.
Pa hopi observador, Minister Gerlien Croes ta representa un populismo opportunista cu ta pone e bienestar di Pais Aruba na riesgo pa interesnan personal y politico. Si e tendencia aki sigui, e futuro desgracia politico di Aruba por tin un nomber y apellido hopi cla. Esaki ta e modus operandusnan cu Hulanda ta perde confiansa den Aruba , pa tipo di politicanan cu ta maneha manera aveztruz