Mayor di Marina A. Boonstra a tuma over e Komando na Kazèrne di Marina na Suffisant na Kòrsou. El a tuma e komando over di Mayor di Marina Steven Baan. Esei a sosedé durante un reunion seremonial, durante kua, ademas di invitadonan , henter e tripulashon di kazèrne tabata representá.
E Komandante entrante Boonstra ta sigui hala e liña aktual di koperashon ku sosionan stratégiko. E ta desplegá su mes pa sòru ku awor i den futuro unidatnan lokal ta pará klá pa por keda desplegá ku rapides na momentu ku outoridatnan ta pidi esei. Esaki dentro di Region Karibe i en general i riba i rondó di e isla di Kòrsou en partikular.
Steven Baan ta mira bèk atras riba un periodo special: “E añanan ku a pasa CURMIL a ekspandé i desaroyá signifikantemente, i por kompetí masha bon mes ku unidatnan ekivalente den Region Karibe. E inkorporashon resien di damanan na e unidat aki ta demostrá ku igualdat no ta solamente un aspirashon bunita, pero realidat. E (re) komienso di e Trayekto Sosial di Formashon, den kua Gobièrnu di Kòrsou ta koperá interministerial huntu ku Defensa, pa ofresé e hubentut di Kòrsou un bunita trayekto pa futuro, por ta bálido komo ehèmpel pa hopi asosiashonnan dentro di NOS Reino. Tur esaki riba un kazèrne ku ta birando mas grandi i mas moderno. Nos Suffisant”.
Suffisant ta un Kazèrne di Marina na unda trupanan operashonal di CURMIL ta ubiká i na unda tantu militarnan di Aruba i di Kòrsou ta risibí treinen na e Sentro di Edukashon Carib. E militarnan di Karibe ta start akinan nan karera militar durante nan promé formashon profeshonal militar básiko. Ademas aki ta tuma lugá e Trayekto di Formashon Sosial, i Suffisant ta e base di Vrijwilligers Korps Curacao/VKC. E trayekto di Formashon Sosial ta un parti importante di e proyekto di koperashon ku Gobièrnu, durante kua un parti di e proyekto ta dura 4 luna di entrenamentu. E entrenamentu militar aki ta destiná prinsipalmente pa siña habilidatnan básiko i ofresé un mihó futuro.
Base di Marina Parera
Tambe na Base di Marina Parera e siman aki a tuma lugá traspaso di Komando. Kapitan Teniente Naval Hezemans, Djaluna 1 di Yüli a entregá Komando na Kapitan Teniente Naval Heerik. Esaki a sosedé ku un seremonia riba tereno di ehersisio na base di Marina.
