ORANJESTAD,Aruba
Parlamentario Mervin Wyatt-Ras a comparti su preocupacion pa loke ta trata e trahadornan di e departamento di Progreso Laboral cu a laga trabou siman pasa diaranson mainta dor di e situacion a-hygienico den cual nan ta labora. E departamento aki tabata situa den un bunita edificio, propiedad di APFA na Seroe Blanco. Pero pa motibonan desconoci, a dicidi di muda pa un edificio na Eagle. Segun cu ta wordo bisa, ta un sponser di Minister di Labor, esta e edificio di Andina Ice. E edificio aki a ser renoba y drecha sinembargo e trahadonan no por a verhuis mesora. Nan a wordo manda cas cu vakantie te ora e edificio a keda cla. Wyatt-Ras mes a haci diferente pregunta na gobierno encuanto di esaki. A puntra dicon e lugar ey a ser escohi, dor cu e no ta un lugar strategicamente. Esnan humilde cu no tin trabou tin biaha tin cu paga 2 bus pa nan yega na e localidad nobo. Pues e no ta un lugar bo situa y alabez tabatin critica cu e servicio no tabata optimal dor cu e personal no por a traha y netamente kier stimula empleo. Wyatt-Ras no ta compronde con e gobierno aki por bisa cu desempleo a baha, mientras cu no ta trahando efectivo na esaki, paso e sitio unda ta atende personanan no ta funcionando. Of desempleo por a baha dor cu no a registra.E trahadonan di DPL, a keha pero esnan na cabez no a haci nada cu e kehonan. Tambe nan a trece nan keho padilanti na Sepa cu si a steun nan. Trahadornan no ta acepta e situacion inhumano aki. Semehante na e situacion di CITGO Aruba Refinery e minister ta muisstil. E ta ausente. E no ta bin padilanti. E no ta duna cuenta. E mester sali na beneficio di trahadornan, sinembargo e no ta haci esaki. E keho ta cu tin schimmel a invadi e luga durante e dianan liber den temporada di Pasco. Pero e asunto aki no ta algo nobo, ya cu den pasado despues di mudamento empleadonan a expresa nan preocupacion caba na hefenan di departamento cu e edificio no ta adecuado pa nan salud, pero e situacion a keda igual y no a tuma ningun medida.Tin fotonan den medio di comunicacion ta circulando. Ta importante pa pone salud di trahadornan na promer lugar y no e interes di otronan, segun Wyatt-Ras. Manera tin bisa e edificio cu tin schimmel ta pertenece na un sponsor di e minister. Esaki ta inacceptabel. Ta pone interes di un sponsor dilanti di interes di trahadornan y di nos pueblo. Paso si trahadornan no por funciona esaki tin su refleho, e tin su efecto ariba nos pueblo y ariba esnan cu ta busca trabou y/of tin un conflicto laboral cu mester di yudansa. Wyatt-Ras ta urgi e minister pa sali ma vanguardia di trahadornan. Pa e mustra cu su curazon ta serca di e trahadornan. Pa e cumpli manera cu den campanja el a grita y priminti, esta cu e si ta bai yuda tur trahador. E trahadornan di DPL a trece nan keho na gerencia y no a haci caso di esaki. Wyatt-Ras y su fraccion kier claridad encuanto loke lo pasa cu e trahadornan. Si nan ta bai cas pa cuanto tempo? Kico ta bai ser haci cu e edificio? Si ta bai bek den e edificio anterior of otro? Segun Wyatt-Ras no ta husto cu trahadornan, mirando e sitiacion financiero-economico cu nos poder di compra a baha drasticamento, tin cu pasa den un situacion semejante. Y cu esnan sin trabou cu no por ser atendi ta keda warda sin por logra haya trabou.