Stichting Monumentenzorg Curaçao e di tres “buurtborrel” pa “stakeholders” di e bario di Scharloo
E “buurtborrel” anteriormente a wordu organisá pa Corendon i pa Securitas/Impacto i tin komo meta di stimulá mas koheshon i interkambio di informashon den e bario. Durante e “buurtborrel”, direktor di Monumentenzorg, Maghalie van der Bunt – George, a anunsiá ku e promé pasonan a wordu tuma pa establesé un organisashon di distrito di Scharloo, modelá riba organisashonnan similar na Punda, Otrobanda, i Pietermaai. E organisashon aki lo funshoná komo punto di kontakto pa e bario den komunikashon ku Gobièrnu di Kòrsou i tambe lo desaroyá su mes inisiativanan pa desaroyo kontinuo di Scharloo.
Van der Bunt-George a menshoná diferente reto i perspektivanan pa futuro di Scharloo. Ela a hasi un yamada na representantenan di empresanan lokal i otro stakeholders pa sigui traha huntu riba un bario kaminda tantu residente komo empresarionan por biba i traha ku plaser. Scharloo ta nos orguyo i, komo parti di Willemstad, ta un sitio di Patrimonio Mundial di UNESCO; esaki ta rekerí protekshon kontinuo i nos kompromiso kompartí pa konservá e herensia. Ela yama atenshon spesífikamente pa e barionan di Fleur de Marie, Swaen, i St. Jago, ku ta situá na Scharloo i kaminda, segun e senso di 2023, tin e porsentahe mas haltu di famianan ku ta biba bou di e liña di pobresa.
E enkuentro tambe a ofresé oportunidat amplio pa sera konosí ku otro i pa amplia red di kontaktonan, di manera ku e partisipantenan por a fortalesé e relashonnan entre nan. Tambe, presidente di direktivadi Monumentenzorg, Herbert van der Woude a hasi uso di e okashon pa tuma despedida ofisialmente e eks direktor di Monumentenzorg, Marcel Dennert.
Stichting Monumentenzorg Curaçao ta wak bek riba un anochi hopi eksitoso i ta konsiderá esaki komo un un paso mas riba kaminda pa mihó kolaborashon i desaroyo komun di Scharloo.
Tokante Stichting Monumentenzorg Curaçao
E fundashon a wordu fundá na 1954 i ta e organisashon mas bieu i mas grandi na Kòrsou riba tereno di konservashon di nos monumentonan. Pa mas informashon tokante Stichting Monumentenzorg Curaçao, bishitá nos página di wèpsait www.monumentenzorg.cw òf sigui nos riba nos kanalnan di medionan sosial.