Na aña 2023 e proyekto oropeo ‘Phito’ a ranka sali. Boneiru, Aruba i diferente país
oropeo, entre otro Spaña i Portugal ta partisipá na e proyekto akí. Departamento di Agrikultura,
Krio di Bestia i Peska (LVV) Boneiru ta e partner lokal ku ta representá Boneiru den e proyekto akí.
Meta di e Phito App
Den e proyekto ‘Phito’ nan ta desaroyá un aplikashon mobil spesial pa kunukero. E Phito App tin
dos funshon importante:
1. Informashon i konseho – E app ta brinda kunukeronan sosten riba tereno di agrikultura i
krio di bestia sostenibel.
2. Posibilidat di ‘netwerk’ – E app ta yuda kunukeronan pa drenta den kontakto ku otro i
traha huntu ku otro stakeholdernan, manera restorant i supermarket. Di e manera akí nan
por sinkronisá nan produkshon mas mihó i komuniká mas efisientemente.
Enkuentro pa aporte di kunukeronan i stakeholdernan
Na luna di òktober 2024 LVV Boneiru a organisá un enkuentro pa kolektá idea i sugerensia pa
desaroyo di e Phito App. Kunukeronan i otro interesadonan a kompartí nan deseonan i
nesesidatnan. Un ehèmpel di un deseo hopi skuchá ta un sistema di notifikashon ku ta informá
kunukeronan tokante áwaseru a base di pronóstiko di wer.
A kompartí e ideanan ku a keda kolektá den e proyekto i a inkluí nan den desaroyo di e app.
Entretantu tin un vershon pa tèst disponibel.
Fitbèk di kunukeronan riba e vershon pa tèst
Den luna di febrüari departamento di Agrikultura, Krio di Bestia i Peska (LVV) Boneiru a okupá su
mes aktivamente ku kolektamentu di fitbèk di kunukeronan tokante e promé vershon di e Phito
App. Esaki a tuma lugá via kòmbersashonnan personal i via enkuentro den gruponan chikitu.
Durante e seshonnan akí e kunukeronan por a download e app i tèst esaki riba nan selular.
Despues di un splikashon tokante e diferente partinan di e app, e kunukeronan a kompartí nan
eksperensianan i sugerensianan.
Mehorashon i próksimo lansamentu
Ta usa fitbèk di e kunukeronan pa sigui mehorá e Phito App, di manera ku esaki ta konektá
optimalmente ku nan nesesidatnan. Ta spera lansamentu di e vershon mehorá promé ku zomer di
e aña akí.
