Accidentnan entre scooter y auto Diabierna 26 di juni, alrededor di 7:40 or di mainta, ‘meldkamer’ central a ricibi notificacion tocante un accident entre un scooter y un auto riba Kaya Nikiboko Zuid. Na yegada di polis a resulta cu e scooter a dal patras di e auto. Conforme e maneho di ‘botsen is blazen’ (dal ta supla), a haci test di supla cu ambos chauffeur y no tabatin indicacion tocante uzo di alcohol. Ambulance a transporta e chauffeur di e scooter pa hospital pa tratamentu medico mas avansa.
Diabierna 26 di juni, alrededor di 8:10 or di mainta, ‘meldkamer’ central a ricibi notificacion tocante un accident entre un scooter y un auto riba E.E.G. Boulevard. E chauffeur di e scooter no a frena na tempo y a dal patras di e auto. Conforme e maneho di ‘botsen is blazen’, a haci test di supla cu ambos chauffeur y no tabatin indicacion tocante uzo di alcohol. Ambulance a transporta e chauffeur di e scooter pa hospital pa tratamentu medico. Mas aleu, e chauffeur di e scooter a haya un boet (multa) pa maneha sin seguro valido. Polis a dirigi trafico na e sitio.
Detencion y entrada hudicial pa violacion di Ley di Opio Den oranan di marduga di diabierna 26 di juni, e Grupo di Tarea Special (Groep Bijzondere Opdrachten, GBO), a detene un homber di inicial G.A.B. di 49 aña di edad na Kaya Maria pa violacion di Ley di Opio BES. Detencion di e sospechoso ta relaciona cu un investigacion andando caminda, durante un entrada hudicial na un cas na Kaya Maria riba diadomingo 14 di juni, a topa cu un cantidad di sustancia narcotico. Despues cu a detene e sospechoso, rechergensenan di KPCN a tene un entrada hudicial na e cas na e kaya menciona y a confisca articulonan relevante pa e investigacion. E investigacion den e caso aki ta continua.
Detencion pa no sigui orden di polis y buracheria publico Diabierna 26 di juni, alrededor di 2 or di marduga, un patruya a constata cu tabatin un bringamento entre algun persona na altura di un establecimento di horeca na Kaya Bonaire. Aki polis a separa e personanan for di otro pa evita cu nan ta sigui bringa. Despues e situacion a calma y e multitud a cuminsa bandona e sitio. Mientrastanto a constata cu un homber na diferente ocasion a trata di busca problema cu un otro homber. Pa evita cu e situacion ta sali for di man, a duna e homber orden diferente biaha pa bandona e sitio. E sospechoso no a sigui orden di polis pa bandona e sitio y a keda detene. Alrededor di 3 or di marduga, a detene e homber di inicial J.G.M. di 51 aña di edad na Kaya Bonaire pa no sigui orden di polis y pa buracheria publico. E homber a purba bringa cu polis, a resisti contra su detencion, a dirigi menasa den direccion di un agente y a intenta di kita e arma di candela for di e agente. Esaki no a logra y e arma a keda sigura den su ‘holster’.
Ladronicia for di algun checkbox / conteiner Diahuebs 25 di juni a drenta keho di destruccion y ladronicia for di tres diferente conteiner riba tereno di un construccion situa na Boulevard Gobernador N. Debrot. Desconocidonan a haya acceso na e conteinernan y a bay cu diferente herment. Ta investigando e caso.
Kiebro na garashi di auto Diaranson 24 di juni a drenta keho di kiebro na un garashi situa na Kaya Nikiboko Noord. Desconocidonan a haya acceso na e tereno y a bay cu un cantidad di herment y machinenan. Ta investigando e caso.
Entrada hudicial y detencion Den oranan trempan di mainta di diahuebs 25 di juni, e Grupo di Tarea Special (GBO) y rechergensenan di KPCN a tene entrada hudicial na un cas na Kaya Cauca. E entrada hudicial ta relaciona cu e investigacion tocante e caso di atraco arma cu a tuma luga na oficina di post (Postkantoor) riba 6 di mei 2025. Relaciona cu e investigacion andando, a detene un homber di inicial D.L.L. di 30 aña di edad. Tambe a confisca articulonan relevante pa e investigacion. E investigacion den e caso aki ta continua.