Con Vzla ta e organisacion local di apoyo pa e comunidad Venezolano. Un organisacion cu ta conscientisa e ciudadanonan ey cu nan pais merece un cambio, pasobra aunke pafo di nan pais, ta mira e lucha interno cu esnan cu a keda atras ta biba den dje.
Vocero di e organisacion Jenny Castro a bin ta organisa e Venezolanonan na Aruba riba e importancia di tin tur documento na ordo pa registra y awo pa deposita nan voto den e eleccion presidencial. Venezolanonan rond mundo por vota, basta cu nan a registra na e Consulado y esaki na Aruba tabata masha poco.
Aunke cu tin basta mil Venezolano na Aruba, menos di tresshen a registra pa e eleccion di awe. Esaki ta debi na diferente obstaculo cu nan a enfrenta pa registra, cuminsa cu yegada di e mashinnan cu tabata laat y e poco dia cu a haya pa registra. Pero “awe nos a lanta feliz y contento,” tabata e prome palabranan cu el a expresa.
For di 5’or nan a yega eynan y ya caba tabatin hende cla pa vota. “E deseo pa un cambio tey pasobra for di 6’or di mainta tabatin hende para eyfo caba cla pa vota. Esaki pasobra nan mester a bay traha” E organisacion tin su hendenan para pafo y ta guia nan den e proceso, revisa nan documentonan cu tur cos ta na ordo. “Esaki ta un luz nobo na final di e tunnel.”
Pa prome biaha despues di 25 aña a logra pa tin testigo tanto paden di e centro di votacion. Nan tin tres secretario y tres testigo, pa cual tur hende ta sumamente contento cu e avanse aki. Tambe mam ;p ta presente den conteo di cada un di e papelitonan di votacion.
El a haci un apelacion na tur persona cu ta registra pa yega trempan pa deposita su vota, cu e cedula lamina, sin importa si el a vence. “E ta nos oportunidad, bo voto ta e yabi pa libertad di nos pais.”
E votonan ta wordo conta aki na Aruba. Si tin duda ta bolbe conta y na final ta manda nan pa Venezuela. E no ta algo cu ta sosode mesora. E conteo ta tuma luga aki mes.
E grupo mes lo spera e resultado y celebra na Bushiri Karting.