No ta un secreto cu e insiguridad den trafico a bira un problema hopi serio na Aruba. Diabierna
ultimo tabatin un vragenuur cu minister di Husticia, Arthur Dowers, netamente tocante e tema
aki. Lamentablemente, e tipo di reunion parlamentario aki no tin espacio suficiente pa un
discusion profundo ni pa pregunta relevante cu por realmente yuda e pais. P’esey durante di un
rueda di prensa dialuna mainta, fraccion di PPA a expresa su preocupacionnan y a anuncia cu
den e siguiente dianan lo manda un set di pregunta formal y detaya na e minister, cu speransa
cu e contesta lo ta mas claro, mas convincente y cu gobierno finalmente lo tuma accion
concreto.
Hipocrecia, falta di dato y riesgo real riba caminda
Fraccion di PPA ta haya e remarca di minister Dowers, esta cu awor Aruba ta importando “hopi
vehiculo barata”, uno lamentabel y hipocrita. “Ta bon pa recorda cu ora minister Dowers mes
tabata Minister di Husticia, e tabatin e autoridad total pa para e importacion di vehiculo cu
stuurwiel na banda drechi (right-hand drive). Esaki ta hustamente e tipo di vehiculo cu ta
drentando Aruba na un prijs hopi barata, haciendo nan mas accesibel y aumentando nan
presencia riba caminda. Esaki no ta algo di awe; ta un practica di mas di 8–10 aña atras”, Eduard
a señala. “Si e minister no a tuma accion, ora cu e tabata na mando, con e por awor bisa cu e
problema ta responsabilidad di otro? Awor cu el a bolbe ta minister, atrobe e tin e oportunidad
pa drecha e situacion y si ta asina, para e importacion aki y pa prohibi e tipo di auto aki di core
riba nos careteranan, como un medida concreto pa salvaguarda seguridad di trafico”.
Fraccion di PPA ta pidi dato concreto y confiabel y p’esey ta haci pregunta skerpi manera;
– Cuanto vehiculo cu stuurwiel na banda drechi y robes tin riba nos caminda?
– Cuanto accidente, fatal, leve y modera, ta tuma lugar cada aña cu e tipo di auto aki?
Riesgo di accidente adicional
Segun Pieters, trafico di Aruba ta diseña pa vehiculo cu stuurwiel na banda robes. Right-hand
drive ta introduci un riesgo adicional: visibilidad ta limita ora bo ta bira, posicion di conductor ta
contrario di loke e caminda ta exigi y e luznan di e vehiculo ta diseña pa un otro tipo di trafico,
strobando e conductor di e caminda contrario. Varios experto a confirma cu esaki ta un factor
crucial den riesgo di accidente.
P’esey PPA ta tambe pidi claridad tambe tocante registro di accidentenan. Ya den 2005, un
rapport di SER a indica un falta di betrouwbare cijfermateriaal. E preguntanan di e rapport ey,
confiabilidad di dato, calidad di analisis y base di decision, ta mesun relevante awe. ForenSys ta
registra accidente for di 2016, pero e pregunta ta: Gobierno ta uzando e informacion aki
strategicamente pa mehora siguridad di trafico?
E momento pa accion ta awor!
Fraccion di PPA ta boga pa un enfoke serio y structural. “E Alto Comisario ya a anuncia cu lo tin
mas presencia di blauw riba caya. Un paso bon, pero no suficiente! Deteccion di velocidad
mester ta modernisa. Hopi accidente tin velocidad halto como factor principal. Mirando tur e
tecnologia actual, falta di agente policial y presupuesto di Aruba, nos mester implementa
sistema di deteccion electronico cu ta manda multa via e-mail of post, manera ya ta practica
internacionalmente y tambe manera bo ta haya cobransa “aanslag” di impuesto na cas.
Pregunta ta simpel: Kico minister Dowers ta bay haci awor? Aruba no por sigui acepta trafico
insigur como algo normal. Bida humano ta supera politica. E momento pa accion real ta awor,”
Eduard Pieters a finalisa bisando.