Alrededor di 30 mil hende ya a registra unda mas cu 10500 hende a ricibi nan promer “shot”
Parlamentario Endy Croes a felicita Minister Di Turismo Salud y Deporte Sr Danqui Oduber pa cu avance magestral alrespecto vacunacion. Dia 13 di Maart 2021 a cumpli net un aña cu e promer dos casonan positivo di Covid 19 a wordo detecta na Aruba. Esaki a cambia tur cos y sigur Aruba a sufri di efectonan gigantesco economicamente. Sinembargo nos ta apoya e energia positivo cu Minister di Salud Danqui Oduber a pone hasiendo tur empeño pa garantisa salud di tur nos concuidadanonan. Sigur nos ta aplaudi e yudansa di Hulanda entre otro pa suminstra Aruba cu e “Vacuna” marca Pfizer.
Secretario di Estado Blokhuis cumpliendo cu tur promesa:
Secretario di Estado Paul Blokhuis encarga cu Volksgezondheid, Welzijn en Sport desde inicio di e Pandemia a percura pa Aruba haña diferente material. Entre otro a yuda Aruba aumenta su cantidad di ICU unit di 11 pa 33. A busca mas personal capacita, mas ventilators y a reinforsa Salud Publico pa por tin mihor control riba e virus. Danki na Minister di Salud di Aruba cu tabata atento manteniendo contactonan estrecho cu Hulanda pero danki sigur na Hulanda pa nan cooperacion y colaboracion cumpliendo cu nan promesa.
Casi 30 mil hende a registra y 10697 hende a ricibi nan promer “shot”:
Te cu diahuebs ultimo alrededor di 30 mil persona a registra unda 10697 persona a ricibi nan promer “vacuna”. Desde 1 di februari registracion a inicia via Aruba Health App pa esnan cu tin un smartphone mientras desde 8 di februari hendenan por registra fysicamente na e 4 MFA nan rond Aruba. Dia 9 di maart e di dos batch di vacuna a yega Aruba. Un total di 12870 cual ta 1170 mas cu e promer batch. Esaki sigur ta algo positivo y ta duna espacio pa duna mas hende vacuna. Di 3 batch ta programa pa yega 23 di maart proximo. Despues cu gran parti di frontliners nan na Hospital a ricibi nan vacuna a bay over di acuerdo cu e protocol cu Hulanda pa nos hendenan grandi di 60 plus. Despues lo sigui cu hendenan entre 18-60 aña cu tin un “onderliggende conditie” pues hendenan cu tin un of otro malesa cronico. Alaves lo tin 2 mobiel cu lo ta brindando vacuna na casnan di cuido di nos grandinan y na bedliggende patienten. Finalmente esnan sin condicionnan medico lo bin na turno pa vacuna. Actualmente ta dunando rond 1000 vacuna pa dia pero e infrastructura y e capacidad optimal a wordo prepara pa por vacuna 1600 hende pa dia. Ta hasi un suplica na henter nos pueblo pa sigui registra pa asina mas tanto hende posibel ricibi e (2) shotnan di vacuna pa nos por crea e “herd immunity”. Nos mester yega rond 75% / (80%) di nos poblacion vacuna pa por logra esaki. Esaki ta importante pa Aruba por draai optimal y normal atrobe. Aruba lo ta e ehempel riba plataforma mundial y lider den nos area. Nos ta hopi dependiente di e mercado di turismo como nos fuente di entrada mayor y pa esaki entre otro e “vacuna” ta hunga un rol hopi importante. Mas liher nos logra “herd immunity” mas liher nos recuperacion lo bay ta creando espacio pa negoshinan coy forsa atrobe, economia re-start y nos mercado laboral bira solido cu cuponan di trabou suficiente pa nos hendenan. Pabien Gabinete Wever Croes y pabien Minister Danqui Oduber. Hunto nos ta logra!
