Gino Goeloe cu plan pa vota “VOOR” pa HOFA y despues asumi un puesto di Directeur na Imsan
Parlamentario Endy Croes ta haci publico un situacion cu te awe tabata den silencio den e gangnan di cocolishi.
Desde 17 di juli, Parlamento di Aruba ta den reces. Esaki no ta nifica cu trabou di un parlamentario ta para. Diferente miembro di MEP ta presente casi tur dia na Parlamento durante e periodo aki. Parlamentarionan di AVP y Futuro, sinembargo, ta completamente ausente. Pero ta netamente den e momentonan aki cu e ‘wandelgangen’ ta papia mas duro.
Goeloe kier ta director di ImSan
E ta un realidad cu Parlamentario Gino Goeloe di Futuro a solicita formalmente pa e puesto di Directeur na Imsan San Nicolas. Esaki ta e mesun Gino Goeloe cu su propio fraccion a baha como Lider di Fraccion den apenas algun luna despues di su nombracion, reemplasand’e cu Parlamentario Lindor. Nos no por lubida cu esaki a sosode sin ningun comunicacion publico.
Pero loke ta preocupa Parlamentario Endy Croes no ta e solicitud riba su mes. Pero e logica tras di dje.
Segun fuente confiabel, e plan tabata simpel: Goeloe lo vota “voor” pa HOFA prome cu aña caba, cumpli cu e deseo di su lidernan Gerlien Croes y Geoffrey Wever, y percura asina pa su partido sosten’e den e proceso pa e puesto na Imsan. Pues Goeloe kier vota pa entrega nos autonomia pa despues e baha na awa pa haya e recompensa.
E deal, sinembargo, no a pasa.
Minister Mervin Wyatt Ras di AVP a ricibi e noticia y a nenga e candidatura di Goeloe categoricamente. Segun informacion den e wandelgangen di Parlamento, AVP tin su propio candidatonan pa Imsan y pa Hospital, y no ta dispuesto pa cede e posicionnan aki na Futuro. E coalicion cu publicamente ta presenta un frente uni ta negociando internamente riba puestonan como sifuera e maneho di nos pais ta un mercado liber di intercambio.
Parlamentario Endy Croes ta expresa cu aunke hopi biaha e no ta di acuerdo cu Minister Wyatt Ras su maneho en general, e ta compronde e decision aki. Un deal unda un voto riba nos autonomia ta wordo intercambia pa un puesto gubernamental ta algo cu no por wordo acepta, independientemente di kende ta propon’e of kende ta neng’e.
Parlamentario Endy Croes ta pidi pueblo di Aruba ta simpel: evalua pa bo mes. Nos ta papia aki di un parlamentario cu ta dispuesto pa vota riba e futuro di Aruba su autonomia financiero a cambio di un puesto. Un coalicion cu ta fractura internamente riba ken ta haya ki puesto. Un proceso di decision riba HOFA cu ta pasa den silencio mientras e pueblo cu mester biba cu e consecuencianan no ta wordo consulta y mucho menos scucha.
“Pueblo di Aruba ta merece miho y kere mi cu pueblo di Aruba ta mirando!”, Endy Croes a termina bisando.