Gobierno ta presenta e Fondo General di Inversion y Desaroyo (AIOF) como un solucion pa acelera inversion den Aruba. E idea ta cu placa pa inversion no lo perde mas na fin di aña, pero por keda disponibel pa despues. E pregunta importante ta: Ta e falta di placa ta e problema, of ta e capacidad pa inverti?
Falta di capacidad
Den e ultimo añanan a sali cla cu Gobierno ta reserva miyones di florin pa inversion, pero hopi proyecto no ta move na tempo. E motibonan ta: falta di preparacion, atraso cu aanbesteding, falta di personal, project management y otro problema administrativo. E falta di capacidad aki ta locual ta tranca e inversionnan di Gobierno.
Un fondo nobo no ta drecha capacidad
E fondo nobo di inversion, manera ela keda presenta pa Gobierno y aproba pa e mayoria den Parlamento, por tene e placa, pero e no por traha mas ingeniero, arkitecto, project manager ni tecnico. E no por haci permiso sali mas lihe ni acelera procedura. Ta esakinan ta e problemanan real cu ta stroba inversion di Gobierno di Aruba, y e fondo nobo no ta contene ningun solucion pa e problemanan aki.
Kico si lo a yuda crea mas capacidad?
Si Gobierno di AVP FUTURO kier a drecha e problema, lo tabata tin mester di otro tipo di medidanan, manera:
Inverti den mas personal cu experiencia.
Fortalece maneho di proyecto den gobierno.
Haci proceso di destaho mas lihe y mas eficiente.
Mehora planificacion di proyectonan.
Modernisa e aparato gubernamental y digitalisa procesonan.
Fortalece control y seguimiento di proyectonan.
Esakinan ta solucionnan cu realmente lo aumenta e capacidad pa ehecuta inversion.
Ley nobo, pero e problema bieu ta keda
Lamentablemente ni Minister Eman of Minister Wever a splica Pueblo of Parlamento kico nan ta haciendo pa trece solucion pa e problemanan di falta di capacidad. Nan ta presenta e fondo nobo como un gran solucion, pero si e problema principal ta falta di capacidad, Pueblo ta haya un Ley nobo, pero e problema bieu mes ta keda.