Como miembro di e Comision Fiho di Asuntonan Social di Parlamento, Parlamentario
Shailiny Tromp-Lee a participa na un bishita di trabou na Fundacion Contra Violencia
Relacional (FCVR). E bishita tabata dirigi riba presentcion di e Plan Strategico di FCVR
2025–2027 di e fundacion, e necesidad financiero y demas retonan di e fundacion y riba e
retonan cu violencia relacional ta representa pa nos comunidad. Alabes a haya un recorido
den nan facilidad.
Durante e reunion, FCVR a presenta nan trabou y experiencianan, y e urgencia cu ta envolvi
den prevencion, guia y cuido di victimanan di abuso. A keda enfatisa cu violencia relacional
ta un problema social serio cu ta rekeri pa atende na un manera strategico, multidisciplinario
y a base di un compromiso comparti entre gobierno, institucionnan y sociedad.
Parlamentario Tromp-Lee a expresa su gran aprecio pa e profesionalismo y dedicacion di e
ekipo di FCVR, y a destaca cu e bishita a duna parlamentarionan un bista directo for di e
expertisenan riba e necesidad real di mas sosten financiero. Segun Tromp-Lee, esaki ta
esencial pa Parlamento por tuma decisionnan mas informa ora di aloca fondo publico.
Principalmente cu ya caba durante tratamento di presupuesto 2025 di Pais Aruba por a brinda
e Fundacion e solucion y sosten financierno asina necesario na un manera structural.
Segun Tromp-Lee, pa nos por sigui construi na un Aruba mas sigur y mas resiliente, nos
mester inverti den prevencion y den institucionnan cu ta traha diariamente cu e realidad di
violencia relacional. FCVR ta cumpli un rol indispensabel den esaki.
Durante e proceso presupuestario, Fraccion di MEP a presenta un mocion pa cubri e
necesidad financiero adicional di FCVR, calcula na 960 mil florin, pa asina fortalece nan
capacidad humano y operativo. Lamentablemente, e mocion no a haya sosten di Fraccion di
AVP y Futuro den Parlamento, apesar cu tabatin recurso financiero disponibel den e
presupuesto nacional pa aña 2025.
Na opinion di Parlamentario Tromp-Lee Parlamento ainda tin e responsabilidad y
oportunidad pa reconsidera e decisionnan tuma y urgi gobierno aloca fondo publico adicional
pa yuda combati un problema grandi na Aruba cu hopi biaha no ta visibel, pero cu tin un
impacto profundo riba nos hendenan, nos famianan y comunidad completo.
Como miembro di Comision Fiho di Asuntonan Social Parlamentario Tromp-Lee a gradici
FCVR su directora sra. Esther Broeksema, Presidente di Directiva sra. sra. Audrey Croes y
nan Programmamanager sra. Cinthya Quant pa e presentacion y nan tempo, dedicacion y
compromiso cu e causa importante aki. A enfatisa riba e desaroyo positivo y grandi cu e ta
mira a tuma lugar ultimo añanan den nan Fundacion y cu nan presencia sigur ta bisto den
comunidad.
Pa termina, segun Tromp-Lee, e palabra clave ta prioridad. Como Parlamento nos mester
demostra cu echos cu e causa aki tin cu keda poni como prioridad y nos mester sigui ta
comprometi pa ta voz di e sobrevivientenan y pa traha incansablemente pa un Aruba mas
sigur pa un y pa tur.