Hopi hende no ta realisa cuanto danjo redo y mentira ta haci den bida di hende.
Redo y mentira ta danja relacion,
Kibra un matrimonio,
Dividi un famia,
Stanca crecemento spiritual,
Pone hende perde tur cos ,
Pone hende bringa cu otro,
Causa guerra entre paisnan,
Causa morto di hende y mas cu tur cos si no tin arepentimiento nan ta hiba hende fierno.
Ora un hende ta ganja e ta kere den su mes cu e cos a pasa , pero e palabra di Dios, ta bisa nos cu tur redo tin su consecuencia y tur mentira tin su consecuencia, y e hacido di redo y e esun cu ta papia mentira no ta keda sin hanja nan pago.
Mete den redo y mentira ta un caya sin salida, pasobra ta solamente cu arepentimento y confesion, bo por sali y wordo libra.
Dios ta odia redo, pasobra redo ta bini for di diabel, y redo mayoria biaha ta mentira.
No tin ningun caminda den nos bida cu mentira no ta conta como pica, por ehempel ora un politico papia un mentira, pa e hanja voto, dilanti di Dios no ta existi politikeria, mentira ta keda mentira y si Dios ta bisa cu mentira ta pica, ta pica e ta , no ta importa ken a papia, e por sali for di boca di mandatario, rey of prins ta mentira e ta keda.
Si bo ganja riba un hende pa asina difama e persona , difamacion ta cay riba bo mes, pasobra ta abo a ganja, si bo envidia ta pone bo haci redu , lo bo carga e consecuencia di hacido di redo.
Lipnan mentiroso ta un abominacion dilanti di Senjor,ma esnan cu ta trata cu fieldad ta su delicia.( Proverbionan 12:22).
Pesey poniendo tur mentira un banda , laga cada un di nos papia berdad cu su prohimo,pasobra nos ta miembro di otro.( Efesios 4:25).
Wak un conseho cu Dios ta duna pa bida di tur hende:
Ta ken ta e hende cu ta desea bida, y stima bida largo, pa e por mira berdad?
Warda bo lenga di berdad y bo lipnan di papia enganjo.
Aparta bo mes for di maldad, y haci bon, busca pas y sigui’e. ( Salmo 34:12-14).
Un bida di redu y mentira no ta cumbini ningun hende, pasobra poco. poco, tur hende ta bin perde confiansa den bo, pasobra e enemigo ta dera bo den scuridad.
Un testigo falso lo no keda sin castigo, y esun cu papia mentira lo perese.( Proverbionan 19:9).
Bo ta destrui esnan cu ta papia mentira,Senjor ta aborece e homber dramado di sanger y ganjado.
(Salmo 5:6).
Ta hopi bon pa mayor sinja nan yiu chikito for di cas, no ganja, papia berdad, pasobra mentira ta trece berguensa, y redo ta trece mal olor, pasobra confiansa ta wordo kibra, cual ta duro pa restaura.
No ta bon pa un mucha ta mentiroso y su mayor ta sostene su mentira, bisando cu e ta defende su yiu all the way, pasobra si como mayor bo ta haci esey , bo ta un piedra di trompica pa bo propio yiu.
Mentira no por ta parti di nos bida, si e palabra di Dios ta bisa den Filipensenan 4:8 cu nos mester ta den cosnan berdadero, puro, nos no por tin un bida di mentira y redo, pasobra e tipo di bida ey no ta agrada Dios.
Dios no ta gusta redu y mentira, pesey nos como hende mester aleha for di tur locual ta redu y mentira,pa nos tin pas.