E nomber riba tur nomber,
E nomber di mas poderoso riba tera, den cielo, bao di tera y riba laman,
E nomber cu no ta cambia,
E nomber cu ta trece salbacion,
E nomber cu ta trece liberacion,
E nomber cu ta habri porta,
E nomber cu ta duna oportunidad,
E nomber cu ta pordona,
E nomber cu ta trece bendicion.
E nomber cu ta pone demonjo keda keto y sali,
E nomber den cual tur rudia mester dobla y tur lenga mester confesa cu e E ta Senjor.
E nomber cu ta trece pas.
E nomber yena cu amor, e nomber yena cu bondad,
E nomber cu ta trece sanacion,
E nomber cu ta trece goso den nos curason,
E nomber di misericordia,
E nomber fiel y husto.
Riba e mundo aki tin hopi nomber cu ta wordo halsa, den media, y cu cada rato cu hende por scucha e nombernan ey no ta tur biaha ta pa algo bon, pero ora nos tende e nomber di Cristo Hesus, nos tur por sa cu algo bon ta bay sosode.Pasobra locual e a haci pa mundo henter ningun hende por iguala.
For di principio di mundo su nomber ta grandi, pasobra semper e tabata tey.
Den Exodus 34:5-7 palabra di Dios ta bisa: Senjor a baha den e nubia,y a keda para eynan hunto cune,e ora ey Senjor a pasa su dilanti y a proclama,Senjor, Senjor Dios,yen di compasion y gracia,Kende no ta rabia lihe y kende ta abunda den misericordia y berdad,Kende ta mantene misericordia pa milnan,Kende ta pordona, inikidad, trangreshonnan y pica,sinembargo di ningun manera e lo no laga di castiga e culpabel,ma ta bishita e inikidad di e tatanan riba e yuinan, y riba e nietonan, te na e di tres y e di cuater generacion.
Lo mi halsabo mi Dios, O Rey,y lo mi bendiciona bo nomber pa semper y semper. Tur dia lo mi bendicionabo y lo mi alaba Bo nomber pa semper y semper.( Salmo 145:1-2).
Senjor merece tur Honor y Gloria, Senjor ta Dios riba tur cos, e tin poder riba tur cos, e ta mira tur cos y e sa tur cos, ningun hende no por adelanta Dios den nada, prome cu nos pensa ya e sa kico nos ta bay haci.No tin nada nobo pa Dios, pasobra e ta Creador di tur cos, pesey su nomber mester wordo exalta di gran manera.
Riba e mundo aki te ainda tin hopi dictador y malbado cu wordo alaba, pasobra nan ta sinti cu nan tin poder riba hende,pero ora Dios dicidi pa kitanan tur nan poder ta iguala na un casca di webo.
Riba e dia cu mi a yama Bo,a contesta mi, Bo a dunami curashi,cu fortalesa den mi alma.( Salmo 138:3)
Nos Dios, ta nos baranca fuerte,nos Dios ta nos fuente di salbacion, y no tin nada, ni tampoco ningun hende cu por tuma su lugar den nos bida, Su palabra ta berdad, su amor ta infinito, y su misericordia ta pa semper,E ta sinta riba su trono santo y sagrado.
Tur loke tin rosea mester alaba Senjor, pa Su gran bondad, pasobra E ta restaura tur cos, E ta duna forsa na esnan cu ta cansa y E nunca ta lubida, ni tampoco desampara su yuinan.
Pesey tur dia nos mester tuma tempo pa alaba y glorifica Su santo nomber, pasobra e ta Dios tur momento pa nos, Su man ta riba nos, y cu Su bista e ta proteha nos, y bao di su halanan nos ta sigur.
Exalta Dios tur momento, y duna Dios tur Honor y Gloria.