Local

Pastor Marcel Balootje: No limita Dios, no limita bo mes, laga Dios dirigi bo bida

Pastor

No ta boluntad di Dios, pa nos limita nos mes, biba den cobardia, y depende riba hende, pasobra pa Dios nada ta imposibel.

Den Numbernan 11:23 Señor a bisa Moises, Señor su poder ta limita? Awor lo bo mira si Mi palabra lo wordo cumpli na bo, si of no.

Den Jeremias 33: 3 Señor ta bisa: sclama na Mi , y lo mi contestabo. Y lo Mi mustra bo cosnan grandi y poderoso cu bo no sa.

Nos Dios ta specialisa den casonan imposibel, caminda hende ta envidia bo y bisa bo cu bo no por, caminda tin hopi strobacion den caminda, portanan ta wordo sera, nos tin cu sigi confia Dios, pasobra den Su man tur cos ta , pesey nos mester depende di dj’E.

Ora nos haci un peticion na Dios, nos mester hacie cu gradicimento, pasobra Dios no ta sinta riba su trono y grawata cabes pensando con e ta bay yuda nos, alcontrario prome cu nos pidi E sa kico nos mester,

Pesey nos no tin cu duda den e poder di Dios.

Nos no tin mester di envidia y copia nada di ningun hende.

Nos no tin mester di keda biba den pasado, pensando cu nos no por logra.

Serca Dios tin sabiduria pa tur esnan cu tin mester.

Dios ta doño di oro y plata, cielo, tera y laman y tur locual cu tin den nan.

Como mayor ta esaki ta e cosnan cu nos mester hinca den cabes di nos yuinan, pasobra pa falta di conocemento di Dios, e diabel ta abusa di nos yuinan.

Nan ta acepta un spirito mediocre y cuminsa limita nan mes y asina no ta logra e proposito di Dios pa nan bida..

E wakmento riba hende, mirando bandido,bagamundo, inmoral y ganster como modelo pa nan bida ta nifica cu nan ta limita nan mes na pensamento di hende, y no ta busca locual Dios tin pa nan.

No ta pasobra bo famia no ta funciona, esey ta nifica cu bo bida ta perdi, no ta pasobra bo tata ta burache, of bo mama ta adicto, esey ta nifica cu mundo a caba pabo, tin speransa den Cristo Hesus,

No ta pasobra bo a comete un error y cay sera, ta nifica cu bo tin un bida di problema, lanta ariba entrega bo bida, na Señor, y Dios lo yuda bo den bo situacion y bo ta sali pa dilanti.

Bo mester siña kere den Dios pa bo mes, pasobra ta solamente asina lo bo tin victoria, ora cu bo mes , reconoce cu bo tabata robes y cu ta Dios ta e unico cu por yudabo.

Placa no por cumpra Dios. 

Placa no por cumpra hende drechi.

Placa no por cumpra matrimonio, pasobra si bo ta ofende y maltrata hende, nan lo bandona bo cu tur bo placa.

No ta tempo pa confia den padrino y madrina, pa yega na algo, of haci cos bao di man. 

Ta tempo pa confia Dios, studia y ricibi bo bendicion cu Dios tin pa bo y asina tur hende mester respeta bo y no por tira nada na bo cara.

 Pero pa bo kita limite for di bo bida, bo mester entrega bo bida na Cristo Hesus y laga orguyo y arogancia,duda, amargura, envidia,inmoralidad bay , pasobra mientras cu bo ta cana den caya di scuridad, bo mes ta aleha e lus di Dios for di bo bida.

Cristo Hesus a bisa: Mira Mi a duna boso autoridad pa trapa riba colebra y scorpion, y riba tur poder di e enemigo, y nada lo haci boso daño. ( Lucas 10:19).

Related posts

Polis ta cla pa temporada di campamento

EA News Author

Santa rosa a ricibi bishita di sr. ing. Edward Berben, ex director di dlvv Boneiro

EA News Author

En conexion cu Dia International di Hende Muhe, Prome minister a reuni cu varios hoben mucha muhe di scolnan secundario na culture café na san nicolas

EA News Author

Leave a Comment

Whatsapp Message