Den Genesis 26 : 4 -5 Senor ta bisa Isaac: Y lo Mi multiplica bo desendientenan manera streanan di cielo,y lo Mi duna bo desendientenan tur e teranan aki, y den bo desendientenan tur nacionnan lo ta bendiciona.
Pasobra Abraham a obedece Mi y a cumpli Mi ordo, Mi mandamentonan, Mi statutonan, y Mi leynan.
Awor Isaac a sembra den e tera ey, y den mesun aña a cosecha cien bes mas tanto.( Genesis 26:12). Y tabata den tempo di secura.
Isaac a wordo bendiciona door di obedencia di su tata Abraham na Dios, obedencia di un tata a habri porta di bendicion pa henter Famia..
Salmo 128:1-4 ta bisa: Bendiciona ta tur esnan cu ta teme Señor, cu ta cana den Su camindanan.
Ora bo come di e trabao di bo mannan, lo bo ta feliz y lo bay bo bon. Bo esposa lo ta manera un mata di wijndruif fructifero ,den e parti mas paden di bo cas.
Bo yuinan lo ta manera palonan di olijfi,rond di bo mesa.
Mira asina e homber cu teme Señor lo wordo bendiciona.
Bendiciona ta e hende,cu no ta cana den conseho di malbadonan, ni ta para den caminda di pecadornan, ni ta sinta riba stoel di bofonadornan.
Ma Su delicia ta den e ley di Señor, y den su ley e ta medita di dia y anochi. Y e lo ta manera un palo planta, canto di coridanan di awa, cu ta duna su fruta na su tempo, y su blachi no ta marchita. Y tur loke cu e haci ta prospera.( Salmo 1:1-3),
Tres ehempel valioso den cual nos tur por mira, kico obedencia y temor di Dios por haci den nos bida.
E asunto aki ta hopi serio pasobra e ta den nos mes man, si nos tuma e decision di cana den obedencia na Dios.
Ora nos mira comportacion di hende riba e mundo aki , con hende ta desobedecido, cherchado, bofonado, gabado, orguyoso, no tin temor di Dios, nos ta compronde dicon tin tanto problema den Sociedad.
E enemigo a sembra hopi tempo pasa un simia di odio y malicia den e mundo aki, cu awor nos ta mira su frutanan, mas cla cu nunca. E enemigo ta odia Dios, kende a tire for di cielo, pa motibo di su orguyo, arogancia, y rebeldia, y mescos ta odia e ser humano, pasobra nan tin contacto cu Dios.
Pesey tur hende mester compronde cu satanas ta haci tur locual ta posibel pa mantene hende den e mundo di malicia y inmoralidad, y pa hende expresa nan mes cu odio contra Dios. Y hopi no ta realisa cu e engaño di diabel ta pa nan destruccion.
Tin biaha bo ta haña duele con por tin hende cu por manifesta tanto desobedencia contra Dios, serando na horea pa tur berdad, y concentra nan mes pa degenera e creacion di Dios y inventa tur sorto di cos pa doctrina hende den maldad y hasta mucha chikito no ta keda for di nan alcanse.
Wak bon cu Hesus a bisa laga e muchanan bini serca mi pasobra di nan e reino ta. Awor e malbado tambe kier e muchanan pa yena nan cu doctrina diabolico y ta bisa pa laga muchanan scohe maldad, pa asina por daña locual Dios ta stima, y na grandi e muchanan lo ta un generacion desobediente yena cu malicia.
Nos lucha no ta contra carni y sanger (Efesionan 6:12). Pasobra e armanan cu nos ta bataya cune no ta carnal ma poderoso den Dios.( 2 Corintionan 10:3-6).
Laga nos continua constantemente den oracion.