Juan 3:16-21 ta e plan di salbacion pa henter mundo, pero tambe un advertencia pa esnan cu rechasa e Yiu unigenito di Dios.
Maldad ta aumenta tur dia riba e mundo, y hende kier biba manera nan kier sin tene cuenta cu Dios y sin ningun clase di temor pa Dios.
Y awor tin un aumento di siñadornan falso, sin consenshi, cu a penetra den tur caminda, bisando cu cosnan cu Dios ta aborece no ta nada nobo pero djis un forma di biba, por ehemplo:
Adulterio no ta cos di preocupa cune,pasobra hende a perde berguensa y no ta respeta matrimonio.
Homosexualismo y lesbianismo, transgender y pedofilia ta djis un forma di bida.
Divorcia djis pasobra bo a hanja gana, destrui famia y bay casa cu otro hende ta cos normal.
Tene relacion cu mucha menor di edad ta un malesa.
No tin cura pa adiccion.
Bida di pica y abominacion, lo wordo aproba pa medio di ley, pa asina scuridad por aumenta.
Fierno no ta existi.
Palabra di Dios ta bisa den Juan 14:6 : Hesus a bisa Ami ta e caminda,y e berdad ,y e bida, ningun hende no ta bini serca e Tata , sino pa medio di Mi.
Palabra di Dios ta bisa den Juan 3;36 : esun cu kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.
E palabra di Dios ta den Marco 16:15: Y E a bisa nan: Bay den henter e mundo y predica e evangelio na tur criatura. Esun cu kere y wordo batisa lo ta salba, ma esnun cu no kere lo ta condena.
Un hende ta wordo conta den esnan cu ta kere, ora e yega na cierto edad cu e mes por confesa cu su boca den kico e ta kere, ningun hende no por kere pa otro, pasobra asina ey e salbacion no ta wordo completa.
Pasobra pa un hende ta salba Romanonan 10:9 mester bira realidad den su bida, pasobra palabra di Dios ta bisa: Cu si bo confesa cu bo boca, Hesus como Señor y kere den bo curason cu Dios a lant’E for di mortonan , lo bo ta salba.
Nos tin cu tene masha bon cuenta, cu hendenan cu ta trastorna e palabra di Dios y asina pone hende cay den rebeldia y trompica, pasobra Dios no ta cambia y ningun hende no ta haci bofon di Dios.
Pesey Dios a laga gran advertencia pa nos;
Pasobra si Dios no a spaar ni e angelnan cu a peca,ma a tira nan den fierno y a condena nan na posnan di scuridad, pa wordo reserva pa huicio.( 2 Pedro 2:4).
Y no a spaar e mundo antiguo,ma a preserva Noe, un predicador di husticia,hunto cu shete otro persona mas, ora cu E a trece un diluvio riba e mundo di e impionan.( 2 Pedro 2:5).
Y si E a condena e stadnan Sodoma y Gomora pa destruccion door di haci nan bira shinishi, haciendo nan un ehempel pa esnan cu despues lo a biba den impiedad.( 2 Pedro 2:6).
Laga nos tene bon cuenta cu no ta tur locual hende ta aproba riba tera, ta wordo aproba pa Dios den cielo, pasobra e diabel tin hopi hende domina bao di e capa di orguyo, cu nan ta pensa cu nan ta doño di mundo y cu no ta respeta Dios su autoridad.
Ta di hendenan aki Pablo ta splica den 2 Timoteo 3:1-5, y awor nos ta mire.
