Cu mas di 20 aña biba na Hulanda, e Arubiano Juvienne Luidens ta un ehempel bibo di con determinacion y creatividad por habri caminda pa exito den exterior. Loke a cuminsa como un pasion pa crea ambiente den fiesta di famia, awe a bira su propio negoshi, Nvmy Party Stylist, un nomber cu cada bes ta zona mas duro den e comunidad.
Juvienne a comparti cu su aventura den e mundo di decoracion a cuminsa formalmente rond di shete aña pasa. “Mi a cuminsa acepta e reto aki di haci decoracion pa fiesta den diferente categoria, manera baby showers y fiesta pa mucha,” Juvienne ta conta cu entusiasmo. Pero e vision di Nvmy Party Stylist a bay hopi mas leu, e meta tabata pa ofrece un servicio completo, caminda e cliente no mester preocupa pa nada.
E inspiracion primordial pa drenta e mundo aki tabata su propio yiu homber. “Mi yiu homber awe tin 16 aña. For di tempo e tabata chikito, bo mes kier haci e bolo, bo kier haci un decoracion chikito, pone blaas aki y aya. Semper mi a bini ta demostra mi parti creativo. Mi ta encanta traha cu mi mannan y pensa ‘out of the box’.”
E energia y e idea aki a sigui crece, Juvienne a cuminsa conecta cu personanan clave den e comunidad di organisa Fiesta, locual a dune e empuhe pa formalisa su soño, comunica cu otronan den e ramo y simplemente go for it.
Un di e contratiemponan mas grandi pa un decorado na Hulanda ta e diferencia cultural den celebracion en comparacion cu Aruba. “Bo tin cu cambia bo mindset,” Juvienne ta splica. “Loke nos ta custumbra di haci na Aruba ta un ‘great job’, pero akinan na Hulanda e ta un nivel completamente diferente y cu otro ideanan.”
Juvienne a nota cu, mientrastanto e comunidad di Hulandesnan europeo tabata custumbra cu un celebracion mas simpel,manera cumpra un bolo den tienda, cende algun blaas y canta,e tendencia a cambia drasticamente den e ultimo añanan. “Awor akinan bo ta mira cu door di e influencia Americano y di artistanan grandi, e Hulandesnan tambe kier haci fiesta grandi. Social media a hunga un rol den esaki y awor tur hende kier algo asina.” Den e transicion aki, Nvmy Party Stylist a sa di posiciona su mes debidamente.
Apesar di su exito comercial cu Nvmy Party Stylist, Juvienne tin su pianan bon planta riba tera y su curason ta keda na Aruba. Riba e pregunta si e tin planea pa bolbe biba riba su isla, e ta hari: “Pa bolbe bek Aruba pa biba, no. Mi ta keda bay di vakantie si, sigur, pa ta cerca mi famia y mi amistadnan, pero biba no , Mi a traha mi bida akinan na Hulanda.”
Juvienne a saca un momento pa manda un caluroso saludo pa henter su famia na Aruba: Famia Luidens, Famia Croes, su ruman muhe, y tur e personanan cu semper ta duna su persona y su negoshi e sosten.
Nvmy Party Stylist ta e prueba bibo cu hopi amor, dedicacion y creatividad, e Arubianonan por make it happen den cualkier parti di mundo!
Pa mas informacion riba su diseñonan, por bishita e social media di Nvmy Party Stylist.
