Un patronchi preocupante di scoge silencio riba transparencia y cobardia politico ta premira un crisis structural den Parlamento di Aruba. Loke mester tabata un organo di control y peso pa balansa e Poder Ehecutivo, awe ta wordo debilita pa maniobranan di e fraccion di FUTURO, sostene pa e coalicion cu AVP. Atacando e fundeshi mes di e debate democratico, e fraccion aki ta mustra un miedo cla pa duna cuenta di nan maneho, kedando na bista di e pueblo di Aruba.
Maniobra pa kibra control y debilita comisionnan parlamentario
E tactica di e fraccion di FUTURO a bira evidente mediante e decisionnan pa desmantela e comisionnan clave di Parlamento. Prome, a kita e Comision di Adulto Mayor for di e fraccion di PPA un accion cu a resulta den un paralisacion total, unda cu te cu dia di awe no a yama ni un solo reunion pa trata e temanan crucial di nos grandinan.
Awo, pa e aña parlamentario nobo aki, e patronchi di censura a escala: a kita e Comision di Finansas for di e fraccion di MEP. Finansas publico ta e curason di e bon gobernacion y transparencia di un pais. Sacrifica e comision aki pa protege mandatarionan di e mesun partido di control debi no ta nada otro cu un intento deliberando pa tapa mal maneho y imposibilita cu e berdad y fechorianan ta yega na conocemento di pueblo.
E silencio di e mandatarionan: Geoffrey Wever y Gerlien Croes
Riba e tereno ehecutivo, e falta di accountability ta mas bisto cu nunca. Minister Geoffrey Wever y Minister Gerlien Croes ta wordo señala como e dos mandatarionan cu mas daño a haci na e structura socio-economico y institucional di Pais Aruba. Enbes di presenta den e Maximo Organo pa splica y defende nan politicanan, e ministernan aki ta opta pa e ruta di cobardia: sconde tras di e marionetanan parlamentario cu ta uza nan mayoria absoluto pa blokia tur intento di control manera un parlamento mester funciona.
E interaccion aki entre e Poder Ehecutivo y e Poder Legislativo ta destruyendo e balansa democratico. E fraccionnan di FUTURO y AVP no ta funcionando como representantenan di pueblo, sino como un escudo di proteccion pa e mal maneho di nan ministernan, negando e mandato constitucional cu Parlamento tin pa controla e maneho di Estado. Practicamente ta mustra cu nan ta complice y tapa riba e maneho nan cu ta wordo hiba tras di cortina.
Un pueblo consciente di e menasa constitucional
E maniobranan aki pa trapa riba e autonomia, e democracia y e deseo di e pueblo di Aruba no ta pasa inobserva. E tempo cu accionnan tras di porta cera por a keda den scuridad a pasa; E pueblo Arubano no ta ciego, ni ta sordo mas. Tur paso, tur silencio y tur decision pa no duna cuenta ta wordo registra pa un comunidad cu ta exigi integridad.
E aliansa entre FUTURO y AVP, enbes di sirbi como un motor di progreso pa e pais, ta demostrando di ta un menasa pa e institucionalidad di Aruba. Ora un fraccion ta goberna abase di miedo,miedo pa e berdad, miedo pa e control financiero y miedo pa e confrontacion democratico,e unico victima final ta e bienestar y e futuro di e pueblo di Aruba. Un biaha mas Partido FUTURO a demostra cu ta e partido di e futuro desaster pa Pais Aruba cu bendicion y apoyo di AVP