Resientemente, Minister Charles Cooper a risibí e plan di akshon integral nashonal pa seguridat sibernétiko. Meta di e plan aki ta pa Kòrsou ta mihó prepará pa atendé ku seguridat sibernétiko riba nivel nashonal.
E grupo di trabou pa loke ta seguridat sibernetiko, bou di presidensia di Sekretario General di Ministerio di Tráfiko, Transporte i Planifikashon Urbano (VVRP), Sr. D. Puriel, den kompania di Sra. M. Bernadina i Sr. W. Geertruida a hasi entrega di e plan na Minister Cooper.
Na 2008 ‘Raad voor de Rechtshandhaving’ a hasi un investigashon riba tereno di seguridat sibernétiko, terorismo, i vigilansia di frontera. A yega na e konklushon ku mester atendé integralmente ku e aspektonan aki.
Pa atendé esaki ta rekerí un enfoke multidisiplinario ku obhetivonan definí konkretamente riba termino kòrtiku i largu. Konseho di Minister a haña importante pa lanta un órgano, esta un Task Force Nashonal pa Asuntunan Sibernétiko (NCTF), ku lo dediká su mes na e trabounan riba nivel nashonal i internashonal pa Kòrsou ta mihó prepará pa atakenan sibernétiko. Den e kuadro aki, riba 15 di yüni 2022, a instalá un grupo di trabou ku a haña e enkargo pa bin ku un plan di akshon integral i
struktural pa ku lantamentu di un NCTF.
E grupo di trabou ta konsistí di e siguiente miembronan:
– Sr. Dwigno Puriel (Presidente)
– Sr. Giovanni King (Miembro den representashon di BTP)
– Sr. Jonathan Castillo (miembro den representashon di Ministerio di BPD);
– Sr. Wilbert Geertruida (miembro den representashon di Ministerio di Hustisia);
– Sra. Marla Bernadina (miembro den representashon di Ministerio di AZ, departamentu WJZ);
– Sra. Royanda Gijsbertha (sekretaria).
Den e plan di akshon, e grupo di trabou a duna rekomendashonnan i pasonan ku mester tuma pa por yega na un NCTF. Tur esakinan ta mará na un skema di tempu.
E siguiente paso awor ta ku e grupo ministerial sibernétiko, konsistiendo di Minister Cooper, Promé Minister Pisas, Minister Martina, i Minister Hato mester tuma nota di e kontenido di e plan, diskuti’é entre nan, i tuma un desishon.