Parlamentario Eduard Pieters ta sigui cuestiona contrato di aproximadamente Afl. 2.1 miyon pa aña y ta exigi claridad riba uzo di fondo publico di ATA
Fraccion di Partido Patriotico di Aruba (PPA) ta aumenta presion riba Gobierno pa entrega documentacion cu, segun lider di fraccion Eduard Pieters, mester demostra cu a sigui ley den otorgamento di e contrato pa maneho di desperdicio financia via Aruba Tourism Authority (ATA).
Durante su rueda di prensa, Pieters a indica cu e asunto ya no ta solamente tocante maneho di desperdicio. Pa PPA, e pregunta central ta, si Gobierno ta respetando e marco legal cu ta regula uzo di fondo publico.
“Nos ta papiando di aproximadamente dos punto un miyon florin pa aña cu ta bay na un solo compania priva. Si a tene un destaho publico, mustra nos e prueba.” Segun Pieters, durante e reunion parlamentario dedica na e asunto, PPA no a haya evidencia cu ta comproba cu un procedimento di destaho publico a tuma lugar. P’esey e fraccion a formalisa su exigencianan den un carta na Conseho di Minister.
Articulo 21: unda ta e prueba di destaho publico?
E punto principal ta articulo 21 di Landsverordening Instelling Aruba Tourism Authority. Segun Pieters, si Gobierno ta sostene cu a otorga e contrato corectamente, mester presenta e documentacion cu ta comproba e procedimento aki. “Nos no a haya ningun evidencia. Si minister tin e prueba, trece!” Pieters a enfatisa cu PPA no ta contra e proyecto ni contra un compania particular. E cuestion ta, si e otro empresanan a haya oportunidad husto pa participa y si a sigui e procedimento legal.
Articulo 20: PPA kier wak e instruccion formal
E di dos exigencia ta relaciona cu articulo 20. Si minister a duna ATA un instruccion formal pa sostene of financia e proyecto, Pieters ta exigi pa Parlamento haya acceso na e Ministeriële Beschikking corespondiente. “Nos kier wak por escrito kico minister a instrui ATA.”
Ademas, PPA ta cuestiona, basa riba articulo 2, si e tipo di proyecto aki ta cay dentro di e meta original di ATA. Pieters a bolbe enfatisa, cu un Aruba limpi ta un meta cu tur hende por sostene, pero cu esey no por bira un argumento pa pasa banda di procedimento legal.
“E fin no ta hustifica e medio.”
Carta di 5 di augustus y deadline adicional
PPA a manda su carta na Conseho di Minister dia 5 di augustus, solicitando tres cos concreto: prueba di e procedimento di destaho publico, e Ministeriële Beschikking relaciona cu e instruccion na ATA y, si Gobierno no por presenta e documentonan, splicacion di kico lo haci pa remedia e situacion. Segun Pieters, PPA inicialmente a duna Gobierno shete dia laboral pa contesta. Despues cu e termino a pasa sin ningun reaccion, fraccion a manda un recordatorio y a concede un termino adicional di 48 ora, ekivalente na dos dia laboral.
“Dicon Serlimar no a haya oportunidad?”
Pieters tambe a pone Serlimar den centro di e debate. Segun Pieters, e compania local a indica cu dentro di aproximadamente cuater siman lo por dispone di e containernan necesario pa brinda e servicio. “Serlimar ta di Aruba. Gobierno ta su doño. Si nos tin un compania local cu por brinda e servicio, dicon no duna e
Serlimar e oportunidad pa duna e servicio?”
“Nos no por normalisa algo cu ta contra ley”
Pa Pieters, aki ta e punto politico mas grandi: Aruba no por permiti cu posibel desviacion di ley bira practica normal. “Nos no por normalisa e accionnan di gobernante cu ta contra ley. Esey ta unda confianza di pueblo den politica ta cuminsa kibra.”
E lider di fraccion a laga sa cla, cu PPA lo sigui eherce su funcion di control, mientras Gobierno no presenta e documentacion solicita. “Mi no ta wordo paga pa bira cara. Mi ta wordo paga pa controla Gobierno.” Su mensahe final na Gobierno ta directo: mustra e prueba, mustra e base legal y, si no a sigui e procedimento, drecha e situacion.