Konferensia di prensa konhunto di kada tres luna
Tourism Corporation Bonaire (TCB) huntu ku su partnernan Entidat Públiko Boneiru, Bonaire Hotel and Tourism Association (BONHATA), Bonaire International Airport (BIA) i Kapitan di Haf a tene nan konferensia di prensa konhunto di kada tres luna. Un análisis remarkabel ku nan a kompartí durante e konferensia di prensa ta e echo ku den luna di sèptèmber, òktober i novèmber 2022, Boneiru a yama bon biní na 39.687 bishitante (no-residente), di kua 51% tabata prosedente for di Hulanda i 23% for di Merka. E kantidat di bishitante ku a yega ku avion a subi ku 10% kompará ku 2019.
Durante e konferensia di prensa diputado di Desaroyo Ekonómiko i Turismo, Hennyson Thielman, a papia tokante e moratorio riba akomodashon turístiko nobo di ménos ku 4 strea i el a duna un aktualisashon tokante e impuesto di turista i e treinen grátis na FORMA pa empleado lokal. ‘Ta bon pa mira ku awor akí ta konbertí nos esfuersonan di e último añanan na bienestar di nos vishon, e plan stratégiko maestro pa turismo i e plan di rekuperashon di turismo, den diferente paso den bon direkshon’, segun diputado Thielman. ‘Si e desaroyo akí kontinuá, e ora ei esaki lo tradusí su mes den un mihó bienestar pa nos hendenan di Boneiru, loke ta nos meta final.’
E direktor di TCB, Miles Mercera, a duna un bista general di prestashon pa luna di sèptèmber te ku luna di novèmber 2022. For di e datonan demográfiko ta resultá ku e grupo di edat dominante di tur bishitante ta varia entre 46 i 65 aña. Si nos wak e pais di orígen, e ora ei nos ta mira ku 51% ta prosedente di Hulanda, 23% di Merka, 11% di Kòrsou i sobrá for di vários otro pais. E promedio di estadia di bishitantenan merikano a keda para na 7 anochi, miéntras ku pa bishitantenan hulandes esaki ta 14 anochi. E tempu promedio di tuma desishon pa biaha ta 82 dia pa merkado hulandes i 115 dia pa merkado merikano. Selebrashon di 55 aña turismo krusero i e ‘branding’ di e stènt di informashon krusero tambe a bini dilanti, i a revelá lansamentu di e Tram Boneiru na Amsterdam durante temporada di wenter, komo parti di e strategia di desaroyo di produkto di TCB. A kompartí tambe vários detaye ku prensa tokante proyektonan di merkadeo ku ta na kaminda i eventonan manera The Earthonauts, de Scholarship Award, The Bonaire Bond i Bario Festival. Finalmente TCB i JC and Friends a firma un Memorandum of Understanding (MoU) pa e próksimo Parada di Simadan durante Dia di Rincon i Simadan di Doei Diaz na luna di aprel i mei 2023.
Veroesjka de Windt, direktor di BONHATA, a kompartí diferente aktualisashon tokante prestashon di akomodashon, ku un grado promedio di okupashon di 66% komparabel ku e di dos i e di tres kuartal. Pa komparashon: 2019 tabatin un okupashon promedio di 66%, miéntras ku na aña 2021 a midi un okupashon promedio di 52% den e último kuartal. Ku esaki nos a alkansá nos grado di okupashon di promé ku e pandemia. Banda di esaki nos a midi un mehorashon den término di nos Tarifa Promedio pa Dia (Average Daily Rate – ADR). E tarifa promedio pa dia pa e di 4 kuartal di aña 2022 ta $ 234. Pa komparashon: aña pasá e tarifa promedio pa dia tabata $ 179. E rendimentu pa kada kamber disponibel pa 2022 ta $ 146. Na aña 2021 esaki tabata $ 95.
Maarten van der Scheer, direktor di BIA, a indiká ku durante e lunanan tras di lomba Aeropuerto Flamingo a keda mira kantidatnan fuerte di pasahero. E aeropuerto a prosesá kasi 10% mas pasahero ku ta yega i bai, ku den e promé 11 lunanan di 2019, e aña promé ku COVID. E grado di okupashon di e buelonan ta haltu den tur segmento. Aeropuerto Flamingo ta invertí den su hendenan i ta fortifiká personal di aeropuerto. E aeropuerto ta kla prepará pa e ‘high season’ binidero ku 2 bali èkstra pa check-in i nan ta realisando diferente mehorashon den e terminal, pa mehorá e kapasidat i eksperensia di kalidat pa e pasaheronan. Huntu ku Entidat Públiko Boneiru i gobièrnu di Reino, BIA ta finalisando un akuerdo tokante mehorashon, ampliashon i sostenibilisashon di e aeropuerto. E direktor a menshoná tambe e MoU tokante buelo pagabel i sostenibel ku resientemente a firma entre e islanan komo prioridat pa e aeropuerto.
Kapitan di Haf Gunther Flanegin a presentá e datonan mas resien di luna di òktober (10 barku krusero) i luna di novèmber (25 barku krusero), i tambe el a duna un bista general di luna di desèmber (25 barku krusero). Tambe el a mustra un vídeo kòrtiku di un app nobo di haf, riba kua por haña tur informashon tokante e barkunan krusero ku ta bishitá nos isla.
Komo parti di e Plan di Rekuperashon di Turismo e stakeholdernan a kuminsá ku e konferensianan di prensa konhunto di kada tres luna, ku komo meta pa promové i stimulá e kolaborashon i informá nos komunidat lokal tokante desaroyonan dentro di e industria di turismo. Den kolaborashon ku su stakeholdernan TCB lo sigui informá nos komunidat tokante e desaroyonan, oportunidatnan i desafionan den industria di turismo.
