Ministerio di Enseñansa, Ciencia y Desaroyo Duradero maneha pa dr. Rudy Lampe a traha desde 2017 den un forma hopi profesional sin haci mucho publicidad. Pa mustra pueblo tur loke e Ministerio aki a haci e ultimo tres añanan ta bay tin un programa special na television titula ‘’cambionan den enseñansa ‘’
Esaki lo pasa riba diadomingo, 23 di mei, via di Telearuba, canal 13. E programa tin un duracion di un ora. E lo cuminsa pa 7’or di anochi.
E programa informativo aki ta bay toca e tema di Enseñansa y innovacionnan den e area cu e mandatario a cuia durante di tur e añanan. Ta trata di un programa unda ta bay profundamente riba e cambionan cu a haci den e area aki, e plan di maneho y con avansa su implementacion ta.
Manera ta conoci, Minister Lampe ta para pa innovacion den Enseñansa, cu uzo di mas tanto posibel sistemanan digital.
Pero tambe e profesionalnan lo colabora y elabora riba diferente tema manera e urgencia pa cambio di nos sistema di enseñansa, nos identidad propio como e punto di salida pa nos enseñansa. Lo papia di e logronan cu e prome Scol Arubano Multi-Lingual cu a haya un acogida masha grandi. Den e scol aki Papiamento ta e idioma di instruccion y na banda tin idiomanan stranhero cu ta Hulandes, Spaño y Ingles.
Pues sintonisa Telearuba diadomingo awo pa 7’or di anochi.