KRALENDIJK,Bonaire
Dia 20 di yanüari e barku krusero Norwegian Epic a bishitá haf di Boneiru pa promé biaha. Esaki ta e promé ‘first call’ di aña 2020. Un delegashon chikitu di Boneiru a bai na bordo di e barku krusero pa sera konosí ku e kapitan i e barku.
E delegashon tabata konsistí di empleadonan di departamentu di komunikashon, gezaghebber Edison Rijna, kapitan di haf Gunther Flanegin, TCB i e agente di barku.
Gezaghebber a yama kapitan Marco Quartesan i e ingeniero hefe Ivan Dimitrov bon biní na Boneiru. El a deseá nan un estadia plasentero na Boneiru. Gezaghebber Edison Rijna a entregá bandera di Boneiru i a duna splikashon tokante esaki. Finalmente tabatin interkambio di regalo entre e kapitan i e delegashon ku tabata na bordo.
Norwegian Epic ta un barku krusero di Norwegian Cruise Line. Norwegian Epic tin 16 dèk i ta konta 14 restorant i 18 bar. Loke ta original na e barku ta e ‘Cirque Dreams and Dinner’, un teater rondó, kaminda ta presentá un shou di dos ora pa 265 pasahero mientras nan ta senando.
