KRALENDIJK,Bonaire
Durante un bishita di trabou na servisio di Agrikultura, Krio di bestia i Peska (LVV) diputado James Kroon a haña informashon tokante e plantashon grandi ku tin aktualmente di ‘buffelgras’ einan.
Lider di e proyekto di LVV Maurice Adriaens, a splika ku nan meta ta aworakí pa promové plantamentu di ‘buffelgras’ serka kunukeronan. E tipo di yerba aki ta fásil pa planta i ta keda bon durante temporada di sekura. Na e momentunan aki Boneiru ta den temporada di yobida i ta bon pa planta e ‘buffelgras’. Asina ta evitá ku tin ku importá yerba na kantidat grandi. Trahadónan di LVV ku yudansa di un trèktòr ta pasa kita e yerba i mara esaki na bulto.
Banda di ‘buffelgras’ Adriaens a mustra diputado Kroon tambe maishi di 6 siman. Esaki ta un maishi mas haltu ku esun konosí komo maishi chikí òf maishi krioyo. Despues ku kita tapushi di e maishi aki e kunukero por usa e loke sobra komo kuminda pa su bestianan.
Diputado Kroon, mirando ku ta temporada di yobida, ta hasi un yamada na nos kunukeronan pa plama simia den kunuku. Áwaseru mes lo hasi e sobrá trabou pa yega na kosecha di ‘buffelgras’. Diputado ta enfatisá ku esaki ta baha gastu di e kunukero ya ku e no tin mester di kumpra bulto di yerba pa su bestianan durante sekura.
Maurice Adriaens a entregá diputado Kroon tambe algun produkto ku trahadónan di LVV a kosechá. Ta trata aki di yambo, pampuna i bonchi largu.
