Digitalisacion ta haci enseñansa mas atractivo y innovativo pa studiantenan.Durante un mainta hopi special, Prome Minister Evelyn Wever-Croes a bishita Scol Dun’un Man na Piedra Plat pa conoce nan proyecto ganado di EduTech y mira e premionan cu e scol a ricibi.
Prome Minister ta indica cu Scol Dun’un Man a ricibi borchinan digital pa cada klas unda por a mira e alumnonan hopi entusiasma, manehando esakinan. Nan a duna un demostracion unda por a mira e facilidad cu nan tin pa maneha e borchinan aki. Cu hopi alegria Prome Minister por a observa e felicidad riba cara di e alumnonan y e maestronan cu e tecnologia digital aki cu ta haci siñamento hopi mas atractivo, facil y agradabel.
EduTech ta un proyecto di Prome Minister di Aruba cu a cuminsa dos aña y mey pasa unda total gobierno a pone mas di 800 mil florin disponibel unda cada scol por a inscribi nan proyecto cu e chens pa gana y asina haya e fondonan pa ehecuta esaki. E meta di EduTech ta pa transforma lesnan dunando oportunidad pa un sistema di enseñansa mas interactivo, atractivo y innovativo pa e studiantenan.
Tambe durante e mainta aki, den presencia di Prome Minister, Scol Dun’un Man a inaugura nan Klas Digital. Esaki ta un klas ful ekipa cu varios sorto di ekipo innovativo, danki na varios otro patrocinador cu a yuda cu esaki. Por medio di esaki e muchanan cu ta atende e scol por drenta e mundo di digitalisacion y ta miho prepara pa futuro.
“Ta hopi bunita pa wak con ta adopta e medio digital den enseñansa pa nos muchanan special. Pa nos, inclusion ta un punto importante, y cu e proyecto aki nos ta contento di por contribui na digitalisacion di enseñansa y inclusion den enseñansa na Aruba. Irespecto cua scol un mucha ta atende tur mester tin e mesun oportunidadnan.
Mi ta gradici Scol Dun’un Man pa kere den e proyecto di EduTech y FUTURA pa e trabou grandi durante e añanan. Danki na tur scol cu a participa y specialmente pabien y hopi exito na tur alumno di Scol Dun’un Man”, Prome Minister a expresa.
