Den e conferencia di prensa di Gobierno di Aruba dialuna mainta, Prome Minister a splica ampliamente riba e varios proposicionnan cu Aruba a manda Hulanda via cartanan dirigi riba nivel di gobernante na Secretario di Estado Alexandra van Huffelen.
CA𝗥𝗧𝗔 𝟯𝟭 𝗗𝗜 𝗔𝗨𝗚𝗨𝗦𝗧𝗨𝗦 𝟮𝟬𝟮𝟯 𝗡𝗔 𝗦𝗘𝗖𝗥𝗘𝗧𝗔𝗥𝗜𝗢 𝗗𝗜 𝗘𝗦𝗧𝗔𝗗𝗢 𝗔𝗟𝗘𝗫𝗔𝗡𝗗𝗥𝗔 𝗩𝗔𝗡 𝗛𝗨𝗙𝗙𝗘𝗟𝗘𝗡:
Den e carta di Gobierno di Aruba riba nivel di Gobierno, cu e fecha di 31 di Augustus 2023, manda na Secretario di Estado Alexandra van Huffelen, e Gobierno a presenta un opcion nobo, un ‘hoofdlijnen akoord’. Den e carta aki tambe e Gobierno a mustra cu riba e fechanan di 29, 30 y 31 di Augustus, ya caba tawata tin combersacionnan cu a tuma luga riba e proposicion ultimo aki cu tambe Hulanda a rechasa riba nivel di ambtenaar. Sinembargo, despues, den un carta cu e fecha di 16 di September, 2023, Secretario di Estado van Huffelen a indica cu e ta dispuesto pa hiba conbersacionnan cu Gobierno di Aruba riba e proposicion aki.
Ta trata aki di e solucion hibrido. E proposicion aki tin riba mesa actualmente y tin mas tanto tempo riba mesa di discusion mientras tur otro a wordo rechasa hopi lihe. Mientras cu e proposicion aki a wordo rechaza na prome instante riba nivel di ambtenaar, e no a wordo rechasa riba nivel di Gobierno. E opcion aki, un direccion hibrido, na unda cu tin algun aspecto den landsverordening, y algun den un rijkswet. Cu esaki, Hulanda lo tin un grip riba algun cos y Parlamento lo tin su autonomia den e landsverordening. Dia 7 di September, Parlamento a bin cu mocionnan y a indica pa e RAft wordo kita for di mesa y pa Gobierno sigui negocia den e direccion hibrido.
Aruba tin un equipo di negociador serio. Durante negosacionnan desde Juni 2022, Aruba a haci varios proposicion, algun riba nivel di ambtenaar, y despues algun riba nivel di gobierno. Cualkier cu ta e caso, pueblo di Aruba por ta sigur cu Gobierno lo sigui busca e miho alternativa pa Aruba. E ley di RAft no ta bon pa Aruba, y tur conseho riba e RAft ta negativo. Gobierno di Aruba ta sigui busca e miho balanse pa henter comunidad”, Prome Minister a indica.