“Apesar cu nos tin comprension pa accionnan di sindicatonan, Gobierno di Aruba, ta urgi sindicatonan pa para e accionnan cu por stroba e recuperacion cu nos ta aden”
Diahuebs 9 di december 2021, Gobierno di Aruba a ricibi un carta habri di 11 sindicato y 2 organisacion. E carta ta contene tres punto di exigencia cu nan tin pa Gobierno. Gobierno di Aruba, pa medio di un carta a duna un contesta detaya riba e carta ricibi.
Exigencianan di Sindicatonan ta: 1. Nan ta exigi pa Gobierno stop inmediatamente cu dialogo cu Gobierno ta hibando cu demas sindicatonan. 2. Urgi Gobierno pa reconsidera e posicion riba e eliminacion di e 12.6% di recorte di salario. 3. Confirma esaki na nan mas tarda diaberna 10 di December 2021 pa 12or di merdia pa evita di e forma aki escalacion di accion.
Reaccionando, Gobierno a manda un carta di dos pagina pa e 11 sindicatonan y 2 organisacion, splicando detayadamente y extensamente riba cada punto enfatisando cu Gobierno tin tur comprension y respet pa e lucha sindical na e momentonan aki. Pero tambe Gobierno ta realisa tambe y ta pidi sindicatonan pa realisa cu e accionnan cu ta tumando luga por stroba e recuperacion cu nos pais ta aden. Y si nos stroba e recuperacion, e ta stroba tambe y alarga e proceso pa nos yega na normalidad na nos pais.
Riba e punto cu sindicatonan ta exigi pa stop cu dialogo cu otro sindicatonan, refiriendo na nan sindicatonan minoritario, Gobierno a reacciona y a indica cu Gobierno ta habri pa dialoga cu tur sindicato y e Gobierno, Gabinete Wever-Croes ta dialoga cu tur sindicato. Prome Minister Evelyn Wever-Croes a indica cu na e momentonan aki, no tin ningun dialogo cu ta tumando luga riba e tema especifico y ta sondiando e posibilidad pa yega na un conscensus cu tur sindicato.
Pa e motibo aki, den e carta di Gobierno, Prome Minister ta enfatisa, Gobierno ta haci un peticion na sindicatonan pa reconsidera nan posicion, pa bin bek na mesa. E Proposicionnan concreto cu Gobierno a pone den su carta ta:
- Pa sindicatonan apunta 3 persona preferibel cu background financiero pa forma un comision hunto cu representantenan di Gobierno di Aruba.
- Pa e miembronan di e comision haya acceso na tur informacion financiero disponibel pa asina sindicatonan tin tur informacion cu awor nan ta indica cu nan no tin.
- E comision ta negocia cu e fin pa prepara un proposicion conhunto di Gobierno y sindicato con lo elimina e recorte salario di empleadonan di sector publico y di sector semi publico.
- Cu e proposicion aki den man, e punto di salida conhunto lo bay negocia cu Hulanda pa yega na palabracionnan concreto pa cu e eliminacion di recorte di salario.
Gobierno a finalisa e carta bisando cu Gobierno di Aruba ta habri pa delibera riba e proposicionnan aki y si mester haci cambio riba peticion di sindicatonan, lo haci esaki.
“Como Gobierno di Aruba, apesar cu nos tin comprension pa e accionnan di sindicatonan, nos ta urgi tur e 11 sindicatonan y e dos organisacionnan aki pa para e accionnan. Pasobra e accionnan aki por stroba e recuperacon cu nos pais ta aden. Mas lihe Aruba recupera, mas lihe nos por bolbe bek na normalidad y mas lihe nos por elimina e recorte di salario. Aruba mester di nos tur awo y mi ta spera di por conta cu un contesta positivo di sindicatonan pa nos bay mesa, dialoga y sali for di e empase aki na un forma cu ta benificia e empleado di sector publico y sector semi publico”, Prome Minister Evelyn Wever-Croes a duna di conoce.