Di e pashèntnan di COVID kontagiá den Kuido Intensivo 83% no ta bakuná. Esaki a resultá for di un investigashon di departamento di Salubridat Públiko di e último tres lunanan. Di e personanan kontagiá ku keda interná den hòspital, 73% no ta bakuná. Un persona kontagiá ku a bakuná den kaso di hospitalisashon ta keda un promedio di tres dia den hòspital. Pa un persona ku no a bakuná òf ku no ta kompletamente bakuná esaki ta ocho dia. Mas òf ménos 33% di e pashèntnan ku COVID ku no a bakuná den kaso di hospitalisashon ta keda mas ku 14 dia den hòspital.
Den e siman di 30 di novèmber 20211 te ku 5 di desèmber 2021 tabatin 151 kaso nobo di kontagio. E kantidat akí te ainda ta haltu, aunke e ta mas abou ku e siman promé. Ku e kantidat di kontagio ta di warda wak si ta interná mas pashènt den hòspital. Hopi siudadano a bai tèst siman pasá. Departamento di Salubridat Públiko ta kontentu ku esaki.
Siman pasá e fuente di kontagio den 33% di e kasonan no tabata konosí. Den e kasonan kaminda e fuente sí tabata konosí, den 33% di e kasonan tabata trata di kontagio via skol i akohida pa mucha. Di e fuentenan konosí 38% di e kontagionan a tuma lugá na kas. Sobrá di e kontagionan ku un fuente konosí a tuma lugá via trabou (15%), kontakto sosial (8%), kuido (4%) i biaheronan ku a drenta (2%).
