Gezaghebber Edison Rijna, riba djaweps 12 di yanüari, konforme tradishon, a organisá un resepshon di Aña Nobo pa habitantenan di Boneiru. Pa motibu di covid esaki no tabata posibel e último dos añanan. Gezaghebber a keda sumamente enkantá ku e asistensia grandi. “Nos a pasa den un temporada turbulento, pero huntu nos a logra superá esaki bon. Laga nos tuma e kosnan bon for di e krísis ei: esta solidaridat i stima próhimo”, gezaghebber a bisa den su diskurso. Mas aleu el a menshoná e kresementu di nos isla. “Esei ta trese tenshon i skarsedat kuné, pero e ta brinda tambe masha hopi posibilidat mes. Laga nos hasi uso di nan.” El a hasi un apelashon tambe riba esnan presente pa asumí responsabilidat den trabou, den tráfiko i den famia.
