UPDATE Prome siman di test RECIP IV. E testnan cu a tuma lugar riba planta RECIP IV den siman di 9 pa 15 di mei na WEB, a bay segun plan y sin ningun interupcion! A haci diferente test riba diesel (LFO) pa cada set di motor conhunto cu e sistemanan auxiliar. E siguiente testnan ta planea pa tuma lugar entre 17 y 22 di mei. E testnan aki lo tuma lugar riba e sistema di Heavy Fuel Oil (HFO).
Manera a comunica anteriormente, WEB lo tuma tur precaucion y coordina e trabou di tal forma pa evita cualkier incidente of interupcion di coriente. Si tur e testnan aki resulta exitosamente, lo pasa pa e fase final di “Trial & Perfromance Test Run”. Esaki ta encera cu e RECIP IV completo lo bay den servicio pa 8 dia. Durante e periodo aki e lo mester comproba di ta opera segun tur parametonan prescribi. E “Trial & Perfromance Test Run” ta planea pa tuma lugar entre dialuna 23 di mei y diamars 31 di mei proximo.
E testnan ta necesario pa por pone e planta nobo RECIP IV den operacion, como reemplaso di e unidadnan di vapor antiguo. RECIP IV tin un capacidad di produccion total di 102 MW y ta planea pa bay den servicio na fin di mei 2022. Cu RECIP IV den operacion WEB lo reduci e consumo di HFO (20-25%), reduci emision di CO2 y percura pa un suministro mas confiabel. Tur esaki ta pas di WEB su vision di ta mas limpi, mas berde y liber di HFO.
