Psicologo Suell Kelly Quant tabata un di e oradornan durante e simposio organisa pa Soroptimist International den conexion cu Dia Internacional di Hende Muhe. Segun Quant, e mainta a bay bon y a keda marca pa hopi interes di parti di e audiencia.
Durante su presentacion, Quant a indica cu tabatin varios pregunta interesante for di participantenan, loke ta mustra cu e topico di trauma y sanacion ta algo cu ta toca hopi hende den e comunidad.
Segun Quant, un di e puntonan mas importante ta cu un persona mester bira consciente cu e tin un trauma y siña pa reconoce e emocionnan cu ta bin cu cu ne. Solamente ora un hende logra reconoce y acepta e situacion, e por cuminsa traha riba e proceso di sanacion.
“Trauma ta yena cu hopi dolo,” segun e psicologo, pero e a enfatisa cu tambe ta importante pa e comunidad compronde cu cada persona tin e capacidad pa heal su mes. E proceso aki, segun Quant, no ta facil y ta tuma tempo, pero cu e guia y instrumentonan corecto, ta posibel pa supera e trauma.
E simposio a brinda un espacio pa reflexion y educacion riba bienestar mental y emocional, tema cu ta bira cada biaha mas importante pa e comunidad.
