E pandemia a siña nos tur con vunerabel y con dependiente pais Aruba ta di turismo. Minister di Salubridad Publico y turismo Dangui Oduber den conferencia di prensa a duna di conoce cu na momento cu e pandemia a cuminsa despues di algun luna IMF a haci un investigacion y a publica un rapport di cua ta e paisnan cu mas a keda afecta pa e crisis di COVID 19. Den e caso aki Aruba a resulta cu ta e di dos pais cu mas a keda afecta y cu e consecuencianan tabata mas severo pa motibo di e pandemia y pa motibo cu Aruba ta depende casi 100% for di turismo.
Segun oduber ya caba for di e prome Gabinete Wever Croes I a cuminsa explora diferente posibilidad pa diversifica e economia. Sinembargo dentro di poco lo bay cuminsa cu e inversion di LNG , tambe a cuminsa cu e proceso di canabis medicinal unda cu a pone un presupuesto pa un departamento di canabis medicinal.
Segun e mandatario un obstaculo cu a encontra na caminda ta e problema di banconan local pa habri un cuenta di banco pa e inversionistanan cu kier haci negoshi den e industria aki a trece padilanti na varios ocasion cu nan ta haya problema cu e banconan local. Pero gobierno no a para keto y hunto cu minister di economia Geoffrey Wever ta buscando solucion pa e problematica aki.
Minister Oduber ta kere cu si tin un solucion pa e parti aki por sigui cu e proceso di destaho cu gobierno a cuminsa cu ne, pero cu na dado momento a para esaki debi no tabatin sentido di duna permiso na inversionistanan debi na e situacion y no por haci negoshi debi na e obstaculo cu tin cu e banconan local.
Minister Oduber ta enfatisa cu unabes cu haya un solucion pa e problema aki ta kere firmemente cu canabis medicinal lo por yuda contribui pa diversifica nos economia mescos cu ta den proceso cu LNG.
No ta solamente a traha den e dos aspectonan aki, pero tambe minister Ursell Arends ta trahando hunto cu e agricultor nan pa sondea e posibilidad pa verifica e economia di Aruba. Gobierno tin atencion riba e parti aki y minister Oduber ta consciente cu Aruba no lo por keda depende solamente di turismo. Aruba completo a biba e momentonan dificil y a sinti esaki tambe unda cu no por depende solamente di e mundo turistico cu Aruba ta ofrece.
Minister Oduber ta kere firmemente cu Aruba tin hopi potencial y tin hopi jong profesionals cu tin deseo di inverti den nan propio negoshi , pero ta gobierno lo mester por brinda e profecionalnan aki e oportunidad unda cu mester stimula nan y elimina tur e redtape nan.
Ministerio di Salubridad Publico y Turismo ta ocupa cu diferente proyecto pa brinda e oportunidad na inversionistanan local. Segun minister Oduber awor cu APA a traha riba un master plan e la keda presenta y e parti mas importante di e master plan aki ta, ta di e desaroyo di e areanan di terenonan disponibel na e waf di barcadera cu ta duna un potencial enorme pa cuminsa un industria nobo di logistica unda lo paketa materialnan y di uza e area como hup . Esaki ta un parti cu tin hopi interes den dje y na unda cu tin hopi local y tambe interes internacional.
E mandatario a duna di conoce cu e siman aki lo haci un bishita na barcadera pa asina mira e situacion y informa e comunidad di kico ta e intencion pa cu e terenonan na barcadera, pero tambe pa esunnan cu tin interes pa nan bin nan remarca pa haya e oportunidad aki pa nan negoshi. Segun Oduber ta tarea di gobierno pa yuda te na unda cu por pa stimula tur esunnan cu tin interes pa inverti