Danki na continuidad den gobernacion
Gabinete AVP-Futuro, hunto cu famia, trahadonan y e compania di construccion, a celebra e punto importante den renobacion di Cas Veneranda: e punto mas halto conoci como spantenbier.
E ceremonia no solamente ta simbolo di progreso, pero tambe di e compromiso pa preserva nos historia. Den su discurso, Prome Minister Mike Eman a recorda e vision original di restauracion di Henny Eman (dfm), cu den e añanan 90 a duna bida nobo na Stadshuis despues cu esaki a bira un ruina. E mesun vision ta biba den minister actual di Finansa, mr. Geoffrey Wever, cu su determinacion pa duna continuidad na e restauracion di nos herencia cultural y historico.
Centro di ciudad, un simbolo di nos identidad nacional, a haya renovacion den epoca di gabinetenan Mike Eman I y II, bao liderazgo di ex-minister Benny Sevinger, den cual a renoba Corte di Husticia, Watertoren, scolnan historico y Bestuurskantoor cu a duna rumbo nobo na Oranjestad.
Desafortunadamente, durante e ultimo gobierno, a opta conscientemente pa para progreso. Pero awe, ta husto pa honra e esfuerso di Minister Wever, a mira e necesidad pa preserva nos patrimonio y a duna impulso na Wilhelminastraat, inspirando otro inversionnan.
