ORANJESTAD, Aruba
Despues di nuebe luna di restauracion, Van Kessel Havenbouw NV, a entrega e edificio, conoci bou di e nomber di ‘Uncle Louis Store’ completamente restaura bek na directiva di Stichting Monumentenfonds Aruba (SMFA) cu na su turno a haci entrega oficial di e yabi na, Gisbert Boekhoudt, director di Directie Natuur en Milieu(DNM).
Den presencia di Minister Lopez Tromp y representante di Ministerio di Cultura, directora di SMFA, Anne Witsenburg a gradeci un y tur cu a forma parti di e proyecto aki; Ministerio di infrastructura, Ministerio di Cultura, RBC, Monumentenbureau, Van Kessel Havenbouw NV cual tabata e contratista cu a haci e restauracion, Archiosa cu a fungi como arkitecto y a dirigi e proyecto, FAVI cu a yuda cu guia den e fase di diseño pa asina por adapta e edificio parti paden pa un trahador di DNM cu ta visualmente incapacita, Lilly Peterson cual a haci investigacion tocante e historia di Uncle Louis Store y DNM cu lo ta e usaurionan di e edificio. Hunto cu DNM a traha riba e proyecto aki cual lo ta tambe e prome monumento di Stichting Monumentenfonds Aruba cu ta inclui panelnan solar, uso di awa recicla y un green wall.
E monumento di Uncle Louis Store ta un edificio construi den añanan cincuenta, diseña pa arkitecto Jan Nagel y construi den un estilo di ‘Nieuw Bouwen’ tabata pa hopi aña edificio di Uncle Louis Store cu tabata un tienda di bende tela y accesorionan di moda. Na principio di añanan nobenta gobierno a cumpra e edificio y esaki a bira oficina di Aduana. Pa basta aña caba e edificio aki ta bashi y a bira tambe un monumento proteha. Despues cu SMFA a cumpra e edificio a cuminsa mesora cu e diseño y restauracion.
Stichting Monumentenfonds Aruba como propietario di edificio lo garantisa un mantencion apropia p’e edificio door di crea un plan di mantencion cu mesun structura cu ta wordo implementa na e otro monumentonan cu ta propiedad di SMFA.
Banda di e Watertoren y Nicolaas Store, esaki ta bira e di tres monumento cu SMFA ta restaura den e area di San Nicolas for di un total di diescinco monumento cu ta pertenece na e fundacion.
Di e forma aki SMFA ta sigui duna contenido na e meta pa preserva nos pasado pa futuro.
