BonaireFeaturedInternacional

Revishon di Boneiru su WolBES i FINBES: Otro reforma kolonial Hulandes sostené pa Konseho Insular di Boneiru?

Revishon Di Boneiru Su Wolbes I Finbes

Debí na BHRO su kampaña di konsientisashon internashonal – Bonaire Life Matters, kual tabata di febrüari 2022 te ku òktober 2023, ku a produsí impaktonan i resultadonan signifikativo. E esfuersonan akí a obligá Hulanda na e tipo di akshonnan aki, pa kamuflá e konstrukshon ilegal di islanan BES, pa evitá ku Nashonnan Uní ta sanshoná nan no kumplimentu i violashon di e tratadonan di Nashonnan Uní. E proseso akí ta ku ayudo i komplisidat di e Konseho Insular. Esaki ta inkluí e koalishon DP i M21, oposishon UPB i MPB i e griffier.

E partisipashon boluntario i kolaborashon di gobièrnu boneriano ku e outoridatnan hulandes pa revisá leinan imponé pa Hulanda i trata e aneksashon ilegal, ta nifiká un intento pa legalisá mas e status aktual, ku ya pueblo boneriano a rechasá. E maniobra akí ta riba mesun liña ku e strategia hulandes, ku, pa medio di su agentenan, a infiltrá den polítika boneriano i ta influensiando esaki. Notabel ta ku e lidernan ku ta pushando e akshon di inkubrimentu hulandes akí awe ta mesun lidernan ku tabata instrumental na 2017 den e desishon pa ankra Boneiru den Konstitushon Hulandes.  Kaminda ku Daisy Coffie di M21 i aktual lider di e delegashon boneriano, na 2017 tabata lider di frakshon di MPB huntu ku Cyril Vrolijk. Vrolijk ku resientemente a kibra su mes gobièrnu i forma koalishon ku Coffie i Clark Abraham di Demokrat, ku na 2017 tambe a kibra su mes gobièrnu di Demokrat i djòin huntu ku Coffie i Vrolijk di MPB i ankra Boneiru den Konstitushon Hulandes. E lidernan akí, ku ta kómplise den traishoná e deseo i desishon di pueblo di Boneiru den referendum di 2015, awor ta fasilitando e agènda hulandes, manteniendo derechonan desigual pa bonerianonan komo siudadanonan di dos i di tres klase.

E intento resien di e lidernan boneriano akí pa influensiá e posishon di Saba i Sint Eustatius, orkestrá pa gobièrnu hulandes  pa medio di un delegashon masivo ku nan a manda Sint Maarten a frakasá kompletamente. Will Johnson, lider di Saba, públikamente a denunsiá esaki demonstrando e kompromiso firme di Saba i Sint Eustatius na derecho i dignidat di nan pueblo. Apesar di aparente promesanan di parti di Hulanda, e aspirashonnan di e lidernan boneriano pa liderá e islanan BES, meskos ku tabata e kaso ku Kòrsou den anterior Antia, a keda rechasá pa e lidernan ku prinsipio di Saba i Sint Eustatius.

Nos ta urgi e Konseho Insular di Boneiru pa ta transparente i duna splikashon komprensivo tokante e karakter i detayenan di e revishon proponé promé ku tuma kualke akshon na nòmber di nos isla na Hulanda. Ta mas ku klaro ku mester aklará e kontenido di e reforma akí na e pueblo.

Ademas, nos ta ekspresá nos profundo preokupashon relashoná ku e ròl prinsipal ku e griffier interino De Wolff a bin ta tumando pa e último aña den asuntunan interno di Boneiru. Un posishon ku mester ta independiente i imparsial, ya ku ta eksistí un konflikto di interes opvio den su ròl. Mirando e importansia di desishonnan relashoná ku e futuro di nos outodeterminashon, ta krusial pa kualke individuo den un posishon asina aki, mantené imparsialidat i integridat. Pa e motibu akí nos ta hasi un yamada na e griffier interino pa kita di e ròl akí, pa evitá di komprometé integridat di e proseso i garantisá un proseso hustu i imparsial pa futuro.  E futuro di nos outodeterminashon mester keda di protehá ku e mayor transparensia i responsabilidat.

Nos ta hasi un yamada urgente na e aktual lidernan di Boneiru, ku ta envolví den e “operashon revishon di WolBES” plania pa Hulanda, pa no sukumbí un biaha mas pa e trampa i strategia Hulandes. E ophetivo di e revishon akí ta pa opstruí e trayektoria di Boneiru pa bai (bèk) riba lista di Teritorionan-Sin-Propio-Gobernashon di Nashonnan Uní. Solamente pa medio di dicho rekonosementu riba e lista di Nashonnan Uní, e pueblo di Boneiru por establesé un relashon ofisial di igualdat ku e gobièrnu Hulandes. Esaki lo enserá responsabilisashon di gobièrnu hulandes, guiá pa Artíkulo 73, ku ta rekerí reportahe anual na e Asamblea General di Nashonnan Uní riba progreso i desaroyo kultural, ekonómiko, sosial, polítiko i edukashonal di tur Boneriano. Esaki ta un paso históriko den direkshon di dignidat i igualdat pa e pueblo di Boneiru.

Related posts

Na Hulanda dos hende muhe di Corsou ta bringa pa homber

EA News Author

Curaçao cu varios persona cu griep y COVID

EA News Author

Minister Maduro a reuni cu Miembro di Conseho di Estado y Miembro di e Camara Presupuestario Hulandes sr. Richard van Zwol

EA News Author

Leave a Comment

Whatsapp Message