Den cuadro di Conmemoracion di Memoria (Dodenherdenking), un delegacion di Arubahuis hunto conhuntamente cu studiantenan Arubiano na Hulanda a bini hunto na Waalsdorpervlakte pa recorda e lucha y sacrificio di e heroe nacional Boy Ecury.
Durante e ceremonia solemne, a pone un krans na e sitio exacto unda e fusilacion di e luchado di resistencia Arubiano a tuma luga durante e Di Dos Guera Mundial. Sidney Kock, representando Arubahuis, a enfatisa e nificacion profundo di e luga aki pa e comunidad Arubiano. “Nos ta na un luga hopi special. Aki e ocupantenan Aleman a ehekuta esnan cu a forma parti di e resistencia, entre nan, nos propio Boy Ecury,” Kock a declara.
Un sacrificio pa libertad Boy Ecury a wordo recorda no solamente como un heroe di guera, sino como un hoben cu a duna su bida pa un libertad den un pais cu no tabata su tera natal. E delegacion di Gabinete di Aruba ta considera importante pa involucra e generacion nobo den e conmemoracion aki. Segun Kock, e meta ta pa conscientisa e studiantenan kende hopi tin e mesun edad cu Boy Ecury tabatin ora el a wordo asesina riba e balor di biba den un mundo liber.
“Boy Ecury a bringa pa libertad y el a paga e prijs mas halto. P’esey nos ta haya importante pa ta aki cada aña cu nos studiantenan, pa nan compronde kico e lucha ey ta nifica, specialmente mirando e tensionnan cu tin awor den mundo,” e representante a agrega.
Impacto den Reino A bishita e sitio bou di e lema “nunca mas,” reflehando e sentimento cu ainda ta biba fuertemente den e sociedad Hulandes. Kock a recorda tambe cu e impacto di e guera tabata sinti na Aruba y Corsou mes, cu e atakenan riba e refineria di Lago y e barconan tankero. Cu e acto aki, Aruba ta mantene e memoria di Boy Ecury bibo como un simbolo di curashi y amor pa libertad den henter Reino.
