Ex-parlamentario Raoul White a lansa un critica fuerte riba e estado di infraestructura y e falta di inversion structural den e scolnan di Caribe Hulandes. Segun White, no por papia di calidad di educacion si e condicionnan basico, manera e edificionan y e ambiente digital, no ta na ordo pa e aña escolar 2025-2026.
White, kende recientemente a bishita varios scol na Aruba y otro islanan, a comparti su preocupacion over di e realidad cu tanto docente como studiante ta enfrenta diariamente. Su enfoke no ta solamente riba loke ta wordo siña den klas, sino riba e entorno completo caminda e desaroyo aki mester tuma lugar.
Infraestructura den mal estado
Un di e puntonan di mas preocupante pa White ta e estado fisico di e edificionan escolar. “Si mi ta drenta un lokaal, e mester ta un ambiente agradabel pa e mucha ricibi les y pa e docente por duna les,” White a enfatisa. El a señala cu hopi edificio no ta den condicion y a duna ehempel concreto di e gymzaalnan cu tin biaha ta keda incompleto pa añanan largo.
Segun e ex-parlamentario, e desaroyo fisico di un mucha ta mesun importante cu e contenido di e bukinan di scol, y e falta di facilidadnan di deporte apto ta stroba e formacion integral aki.
Digitalisacion y conectividad
Mirando e era moderno, White a subraya cu inversion den enseyansa mester bay man den man cu tecnologia. Pa e aña escolar 2025-2026, e ta considera cu e ambiente digital y conectividad den scolnan mester ta un prioridad halto. Sin e hermentnan digital aki, e atraso den comparacion cu Hulanda Europeo lo sigi crece.
Yamada pa un Masterplan
White a pidi formalmente na e Secretario di Estado y e Minister di Enseyansa pa stop cu e maneho di soluciona problema “mondjesmaat” (poco-poco). Na lugar di esey, el a exigi un Masterplan structural pa elimina e e atraso cu tin den nivel di enseyansa den Caribe.
“Cu inversionnan chikito aki aya bo no ta resolve e problemanan structural,” White a declara. E meta di e masterplan aki mester ta pa garantisa cu e nivel di educacion den e parti Caribense di Reino ta igual na esun di e parti Europeo, cuminsando cu scolnan bon ekipa, safe y tecnologicamente avansa.