Den cuadro di e discusionnan rond di e Ley di Reino riba Supervision Financiero (Rijkswet HOFA), ex-parlamentario Raoul White a subraya cu e base pa cualkier gobernacion exitoso ta un finansa publico saludabel. White ta boga pa un “disiplina politico” caminda Parlamento di Aruba mes ta asumi su rol di control, sin mester depende structuralmente di Hulanda. Mester tin e madure politico ey.
Pa White, e punto di salida pa e proceso di HOFA mester ta hopi cla: e finansas di e pais mester ta na ordo. Segun su declaracion, esaki no ta djis un rekisito tecnico, sino e fundeshi mes pa por goberna un pais debidamente y cumpli cu e necesidadnan di e pueblo.
Control structural y disiplina politico
Fuera di un structura di control financiero fuerte, White ta introduce e concepto di “disiplina politico” como un pilar fundamental. E ta argumenta cu e responsabilidad principal di controla e gastonan di Gobierno ta descansa den man di e representantenan di pueblo den Parlamento di Aruba.
“Mester tin e disiplina ey den bo mesun cas,” White a enfatisa, indicando cu un Parlamento cu ta controla efectivamente su Gobierno ta fortalece e autonomia di e isla. Segun e ex-parlamentario, no mester ta asina cu semper mester mira den direccion di Hulanda pa e trabou di supervision ey wordo haci.
Fortaleciendo autonomia
E vision di White ta basa riba e idea cu ora un pais tin control total y responsabel riba su mesun finansas, e ta menos vulnerable na intervencionnan externo. Door di aplica un control structural den e mesun Parlamento, ta percura pa e placa di pueblo wordo gasta na un manera transparente y responsabel.
White ta conclui cu e responsabilidad aki ta crucial pa e futuro di e relacionnan den Reino, caminda un Aruba financieramente disciplinado por fungi cu mas independencia y forsa den su propio gobernacion. E uniconan cu por haci esaki ta e propio parlamentarionan di Aruba.