E proyecto pa hoben “The Next Wave” na Jong Bonaire a conclui exitosamente. Durante e periodo di 7 di maart te cu 23 di april, varios hoben a participa activamente den e iniciativa aki, caminda salud, nutricion y emprendemento tabata central. E proyecto no solamente a brinda conocemento, sino a stimula e participantenan pa tuma decisionnan mas saludabel den nan bida diario y den nan comunidad.
Dienst Volksgezondheid (GGD) di Entidad Publico Boneiro a ehecuta e proyecto den colaboracion cu Jong Bonaire y Scholengemeenschap Bonaire (SGB). Danki na e cooperacion amplio aki, e habilidadnan cu e hobennan a adkiri ta keda util den practica.
Durante e curso di “The Next Wave”, empleadonan di cushina di Jong Bonaire y SGB a participa den tayernan di cushina, unda nan a siña prepara receptanan saludabel y saboroso pa gruponan grandi. Paralelamente, e hobennan di Jong Bonaire a ricibi lesnan teorico y practico riba temanan manera nutricion consciente, lesamento di etiqueta y e impacto di alimentacion riba salud fisico y mental. Nan mes a prepara snack y cuminda saludabel, y a crea videos y un cancion pa comparti e mensahe di un estilo di bida sano cu e resto di e isla. Como parti di e programa, e hobennan a disfruta semanalmente di un lunch saludabel prepara pa nan propio kokinan.
E participantenan a reacciona cu entusiasmo. Un di e hobennan a comenta riba e parti di “Show Up”, unda nan a fungi como embahador di salud: “Loke mi a gusta mas ta cu como un grupo di mucha muher nos a traha hopi bon hunto. Nos a siña y logra algo bunita.”
GGD Bonaire ta mira bek riba e proyecto cu gran satisfaccion, considerandone un paso crucial den prevencion y educacion nutricional pa hoben. E colaboracion entre partnernan y e involucracion di e hubentud ta forma un base solido pa futuro iniciativanan. Cu proyectonan manera “The Next Wave”, Boneiro ta sigi inverti den un generacion cu ta enfrenta futuro di un manera consciente y saludabel.
