Lider di fraccion di FUTURO, Ruthlyn Lindor, a expresa su decepcion cu e manera cu e debate parlamentario riba e destahonan publico den enseñansa a desaroya. Segun Lindor, miéntras cu e tema central ta di vital importancia pa e materialnan educativo na Papiamento, oposicion a scohe pa “boycot” e reunion cu temanan cu no tin nada di haber cu e agenda estableci.
Lindor a splica cu e reunion a wordo pidi a base di un comunicado di prensa tocante destahonan publico bou di e Minister di Enseñansa. Maske e mandatario a contesta preguntanan ampliamente caba den pasado, e parlamentario a nota cu durante e reunion di awe, e enfoke a wordo desvia completamente.
E problema real den Enseñansa
E parlamentario a trece dilanti un situacion cu tin basta tempo andando y cu ta afecta e desaroyo di material escolar local. “Tin un grupo chikito so di profesionalnan cu tin e experiencia pa traha material educativo na Papiamento,” Lindor a splica.
El a señala cu den pasado, bou di e ex-mandatario di enseñansa, a laga e procesonan di pago habri sin e debi formalisacion. Esaki a obliga e Minister actual pa firma decisionnan ministerial (MB) sin un destaho publico previo. Lindor a aclara cu, maske ley ta permiti excepcion, esaki no mester bira un custumber y cu e meta di e reunion tabata netamente pa drecha e procesonan aki pa futuro.
“Teatro Politico”
Pa e lider di fraccion di FUTURO, ta lamenta cu e debate a bira un escenario pa politica partidista en bes di busca solucionnan pa e sector educativo.
“Publico tin cu presencia un teatro politico completo. Nos ta mira full otro cos cu no ta e tema principal. Mi no sa si awe nos por yega na un solucion, pasobra oposicion ta purba boycott e reunion cu otro topiconan,” Lindor a declara.
Buscando un solucion definitivo
Apesar di e interupcionnan den e proceso parlamentario, Lindor a reafirma cu e Minister ta trahando riba un structuralisacion pa evita cu enseñansa ta wordo para pa falta di profesional of pa procesonan administrativo cu no ta cana debidamente.
E parlamentario ta spera cu, na momento di duna contesta, e Minister haya e espacio necesario pa splica e detayenan tecnico y e plan di accion pa garantisa cu e materialnan didactico yega na nos alumnonan sin mas contratiempo.