Frakshon di Movementu di Pueblo Boneriano (MPB) ta ekspresá su desapunto profundo tokante e echo ku e partidonan di koalishon a vota kontra e moshon pa mantené e parti protokolar di Dia di Boneiru riba e dia ofisial di e selebrashon, esta dia 6 di sèptèmber. Frakshon di MPB ta enfatisá ku netamente riba un dia manera Dia di Boneiru, solidaridat i unidat mester ta sentral. Ta trata di un dia kaminda henter nos pueblo ta bini huntu pa selebrá nos historia, nos kultura i nos identidat.
Na momentu ku otro miembronan di Konseho Insular nenga di koperá pa mantené e parti protokolar importante akí, innesesariamente esaki ta trese un kiebro den e solidaridat akí. Frakshon di MPB ta posishoná su mes kompletamente tras di e moshon i ta suprayá ku no por kambia fecha i ora di asuntunan protokolar manera hisamentu di bandera i diskursonan ofisial den un forma arbitrario.
Falta di rèspèt pa pueblo
Ku su rason pueblo ta verwagt ku e seremonianan akí ta tuma lugá riba e dia ku ofisialmente i tradishonalmente ta pertenesé na Boneiru: dia 6 di sèptèmber. Pa medio di pèrsistí pa tene un seremonia dia 5 di sèptèmber, e partidonan di koalishon ta laga tur hende mira ku nan no ta skucha sintimentu di nos pueblo i hasiendo asina nan ta mustra ku nan no tin rèspèt pa e dia importante akí, ni pa unidat di nos pueblo. Pa e motibu akí frakshon di MPB lo no ta presente tampoko na e parti protokolar si esaki tuma lugá dia 5 di sèptèmber. “Nos ousensia ta un muestra di sosten na pueblo di Boneiru, ku ta desaprobá e aktuashon anti-demokrátiko di e koalishon i di Kolegio Ehekutivo”, segun Hennyson Thielman na nòmber di frakshon di MPB. “Dia di Boneiru ta di nos pueblo i mester selebrá esaki dia 6 di sèptèmber.”