For di 25 di januari te cu 1 di februari nos ta celebra e siman di “ban lesa cu mi” na
Boneiro. E siman aki cu a keda organisa den colaboracion cu Biblioteca Publico Boneiro, Biblionef
y ‘Nederlands Letterenfonds’ ta dedica completamente na e importancia cu lesamento pa mucha
tende tin pa desaroyo di mucha jong.
Lesa pa mucha tende ta stimula imaginacion y ta yuda nos muchanan descubri palabra y storia nobo. Durante e siman special aki tin tur sorto di actividad pa mucha di 0 te 6 aña.
Riba diasabra 25 di januari e campaña ta habri den un forma festivo cu un Desayuno di Lesa y un
presentacion di e buki “Kumbai Baby” di parti di Mylo Freeman.
Durante e siman varios persona conoci cu ta lesa pa mucha tende ta bishita diferente acogida pa mucha, entre otro e escritor Mylo Freeman (Hulanda), e actriz Milushka Birge (Corsou), e contado di storia Jeaniro Dorothea (Boneiro) y e docente Thasjanara Rosario (Boneiro). E momentonan di lesa pa mucha tende aki ta specialmente pa mucha di 3 te 4 aña y nan ta tuma luga na diferente acogida pa mucha na Boneiro.
Banda di esaki Mylo Freeman den colaboracion cu Biblioteca ta organisa un seri di tayer, entre
otro un tayer di Barbie, un tayer di Prinsesa Arabella y algun tayer di ilustracion y skirbimento. Tur
actividad ta accesibel gratis, pero registracion ta necesario pa motibo di e cantidad limita di luga.
Por haci esaki via e QR-code cu lo ta disponibel na Biblioteca i riba nos pagina di Facebook.
Tocante e Siman di “ban lesa cu mi”
E Siman di “ban lesa cu mi” ta un evento cu ta bini bek tur aña na Hulanda y den Caribe, y su
intencion ta pa pone enfasis riba importancia di lesa pa mucha jong tende y pa stimula nan amor pa
lesamento. Na Boneiro nan ta brasa e iniciativa aki cu hopi entusiasmo, cu un siman yen di
actividad di lesamento pa mucha tende y tayer.
