St. Maarten a duna bonbini na e buelo inaugural directo di Southwest Airlines for di Orlando diamars ultimo. Esaki ta marca un expansion significante di e conexion aereo di e isla y ta fortalece su lasonan cu e mercado di Estados Unidos.
E buelo Southwest 1873 a baha na Princess Juliana International Airport (SXM) poco despues di merdia, lansando asina un servicio diario directo nobo entre Orlando International Airport (MCO) y St. Maarten, cu un tempo di buelo di aproximadamente tres ora.
E ruta nobo aki ta brinda acceso directo na uno di e puntonan di biaha (hubs) mas ocupa di Estados Unidos, conectando St. Maarten cu miyones di bishitante potencial y ofreciendo conexionnan pa docenas di ciudad Mericano via e red domestico di Southwest Airlines.
Minister di Turismo, Asuntonan Economico, Transporte y Telecomunicacion (TEATT), Grisha Heyliger-Marten, a describi e lansamento como un paso clave pa fortalece e posicion turistico y economico di e isla.
“E buelo aki ta haci mas cu djis conecta dos destino; e ta conecta St. Maarten cu oportunidadnan den henter Estados Unidos,” e Minister a declara. “Cu e servicio nobo aki for di Orlando, nos ta fortaleciendo nos acceso na uno di e hubs di biaha mas importante di U.S., conectando nos isla cu miyones di bishitante potencial via e red di Southwest.”
Director di Turismo, May-Ling Chun, tambe a duna bonbini na e servicio nobo, resaltando su importancia pa e marketing di e destino y e crecemento sostenibel di bishitante. El a señala cu Orlando ta un porta di entrada clave cu tin lasonan fuerte tanto cu biahero di placer como cu e diaspora di Caribe na Florida.
Representantenan di Southwest Airlines a nota cu e lansamento ta refleha e expansion continuo di e compania den Caribe y su confiansa den St. Maarten como destino. Adam Decaire, Senior VP di Network Planning, a expresa cu nan ta orguyoso di ofrece biahenan mas combiniente y pagabel pa nan clientenan.
E yegada di e buelo inaugural a subraya e facilidad di biaha entre Orlando y St. Maarten. E bishitantenan a wordo ricibi riba un isla conoci pa su experiencia unico di “dos nacion”, caminda St. Maarten y Saint-Martin hunto ta ofrece 37 playa, influencianan cultural diverso y un escena culinario reconoci mundialmente.
